Семей теміржолшылары биыл да наурыз мерекесінің көрігін қыздырды
Абай облысы бойынша меншікті тілші
Биылғы Наурыз мейрамын Шығыстағы Семей теміржолшылары да өзіндік сән-салтанатымен атап өтті. Желі бойындағы барлық мекемелер ұжымдары арасында мерекені өз нақышына сай тойлады.
Дегенмен, ең ауқымды шара, әрине, Семей жүк тасымалы бөлімшесі бас кеңсесіндегі Наурыз тойы болды. Бұл күні бөлімше ауласына жиналған аймақ теміржолшылары талай қызыққа куә болды. Бөлімше басшысы Сиязбек Әлішев пен Семей магистральдық желі бөлімшесінің бастығы Айдын Шәукежанов және салалық кәсіподақ төрағасы Алик Досанов құттықтау сөз сөйлеп, жылы лебіз білдірді. Ардагерлер кеңесінің төрағасы Қырықбай Әлсейітұлы ақ батасын берді.
Мерекелік салтанат ажарын жергілікті теміржолшылар қауымының өз күштерімен даярлаған мерекелік концерт аша түсті. Әсіресе, Семей станциясы мен НЖС-6 мекемесінің өнерпаздары ән мен жырдан тарту тартып, мереке шырайын аша түсті. Қазақы дәстүрге сай наурыз шашуы шашылып, жиналған көпшілік жылдан жылға аман-есен жете берейік деген ниетпен наурыз көжеден дәм татып, тілек тіледі.