Маңғыстаулықтар наурыз мейрамында түбек табиғатына төзімді көшеттерді отырғызды
Маңғыстау облысы бойынша меншікті тілші
Маңғыстаулық теміржолшылар биылғы Наурыз мейрамына орай жаппай ағаш отырғызды.
«Атадан мал қалғанша, тал қалсын» деген тәмсілді басшылыққа алған жергілікті теміржолшылар мейрам құрметіне сенбілік ұйымдастырып, айналаны тазартып, түбектің қатаң табиғатына төтеп беретін көшеттерді көптеп отырғызуды қолға алды. Себебі, құмды дауыл жиі тұратын өлкеде қалқан болар тал-теректің көп болғаны дұрыс екені дау тудырмаса керек.
Мереке күні наурыз мейрамын осындай игі іске арнаған теміржолшылар жылдағыдай киіз үй тігіп, ұлан-асыр тойлауды биыл екінші жыл қалдырып отыр. Оған себеп – әлемді шарпыған пандемия мен қауіпсіздік. Әрбір ұжым жұмыс орындарында дастархан жайып, наурыз көже, құрт пен бауырсақ, қымыз бен шұбат, ірімшік сияқты құнарлы ас-тағамдардан дәм татты. Көпшілікті Ұлыстың ұлы күнімен құттықтаған бөлімше басшысы Н.Ғұбашев ел аман, жұрт тыныш болып, барыс жылында бөлімше өндірістік көрсеткіштерді көтеріп, жоғары нәтижеге жол жеткізеді деп сенім артатынын жеткізді.