Ақтауда көлік колледжінің студенттері сала ардагерлімен кездесті
Маңғыстау облысы бойынша меншікті тілші
Ақтау көлік колледжінде «Аталар жолымен, ағалар ізімен» атты тақырыпта тағлымдық іс-шара өтті. 12 мамыр – М.Тынышпаевтың туған күніне орай даңқты теміржолшылар әулетімен кездесу және студенттердің ғылыми-практикалық конференциясы ұйымдастырылды.
Кәсіптік бағдар бере отырып мамандықты дәріптеуге арналған шараның қадірлі қонақтары өңірге танымал, түбек теміржолына еңбегі сіңген теміржолшы әулеттердің өкілдері болды. Бұл әсіресе кәсіптік білім алып жатқанмен ертеңіне күмәнмен қарайтын, болашақ мамандығының маңызын жете ұғына қоймаған студент жастар үшін танымдық, тағлымдық һәм тәрбиелік мәні зор шара болғаны анық.
– Колледж табалдырығын аттаған кешегі оқушы, бүгінгі студенттерді «Қандай мамандықты таңдадым?» немесе «Мамандығым бойынша болашақта қандай жетістікке жете алам?» деген ойлар мазалайтыны жасырын емес. Сондықтан студенттеріміздің таңдаған мамандығы, оның қоғамдағы орны, жетістікке жету жолдары туралы білімін кеңейтіп, бағдар берген бұл басқосу екі буынның диалогы ретінде өтті десек те болғандай. Аға буынның саладағы қызметімен кәсіпке адалдығы, жеткен жетістігі жас буынға ерекше әсер етіп, болашақтарына сенім ұялатқанына куә болдық, – дейді колледж директорының тәрбие ісі жөніндегі орынбасары Роза Кезбаева.
Студенттермен кездесуге түбек темір жолына еңбегі сіңген құрметті теміржолшы ардагерлер Табылды Әміров, теміржолшы ардагерлер кеңесінің төрағасы Амандық Алдабергенов, Маңғыстау қосалқы бөлімінің бастығы, облыстық мәслихат депутаты Нәжімеден Ғұбашов, Қозғалыс қауіпсіздігі департаментінің Маңғыстау өңірі бойынша бас ревизоры Болат Дүйсәлиев, Маңғыстау белгі беру және байланыс дистанциясының бастығы Кенғали Асқанбаев келді.
Сондай-ақ, осы колледждің оқытушысы Марат Ағатай мен директордың оқу-өндірістік жұмыстары жөніндегі орынбасары Ақжігіт Ахмедов те бұрынғы теміржолшылар қатарынан. Студенттер қонақтарды қошеметпен қарсы алып, үлкен құрмет көрсетті. Олардың естеліктерін тыңдап, түбек теміржолының кешегі-бүгінгі тарихынан мол мағлұмат алды.
Кездесу М.Тынышпаевтың 143 жылдығына арналған конференцияға ұласты.