Қызылордада оқушыларға қауіпсіздік ережелері түсіндірілді
Қызылорда облысы бойынша меншікті тілші
Күнделікті өндірістік жұмыстарымен қатар жол бойының тұрғындарын теміржолдың қауіп-қатерінен сақтандыру – бүгінде барлық аймақ теміржолшылары үшін қосымша жұмысқа айналғалы қашан...
Тіпті қосымша жұмыс емес, кәсіби міндетке айналған десек болғандай. Кез келген адамның теміржол бойында бейберекет жүруі қауіпті екендігі баршаға түсінікті болғанмен бейсауыт жандардың өз өмірлерін қатерге тігуі тыйылар емес. Оқу жылының соңғы күндері құрамында Қызылорда станциясының бас инженері Сағымжан Есмаханов, Әскерилендірілген теміржол күзетінің шұғыл әрекет ету тобы басшысының орынбасары Жандос Тарманов және ЖІІб ӘПб құқық бұзушылықтың алдын алу тобының инспекторы, полиция лейтенанты Берік Аққалиев бар топ станция маңындағы №6 мектеп оқушыларымен кездесу өткізді. Ертең каникулға шығатын балаларды аса қауіпті аймақ – теміржолда абай болуға шақырды. «Тоқтаңыз! Басып кету қаупі бар» акциясы аясында түсіндіру жұмыстарын жүргізіп, қауіп-қатердің аяқ астында екенін түрлі мысалдармен көрсетті. Әсіресе, құлаққап кигендер келіп қалған пойыз даусын естімей опық жейтіндері айтылды. Түн мезгілінде бейсауыт жүрмеу керектігі, кез келген бұзақылық, заңсыз әрекет үшін өздері немесе ата-аналары қылмыстық немесе әкімшілік жауапкершілікке тартылуы мүмкін екені ескертілді. Қауіпсіздік жадынамасы мен ескерту парақтары таратылды.
– Акция аясында мектептер мен қоғамдық орындарды аралап, тұрғындарға қауіпсіз жүріп-тұру ережелерін сақтауды ескертіп, бала-шағаның вагон терезелеріне тас атып әйнегін сындыру секілді бұзақылықтар үшін қандай жауапкершілікке тартылатынын да айтып жатырмыз. Мұндай жұмыстарға құқық қорғау өкілдерінің қатыстырылуы маңызды, өйткені жанымызда полиция өкілі болмаған жағдайда адамдар ескертуімізді елең етпейтін болды. Жалпы қауіпсіздік акцияларының бәрі теміржол бойында адам өміріне төнетін қауіптің алдын алу, адамдар өмірін сақтауға бағытталған, дей тұрғанмен, сол адамдар өз өмірлеріне немқұрайлы жауапсыз қарайтыны өкінішті, – деді станцияның бас инженері Сағымжан Есмаханов.