Маңғыстауда «маймыл шешегінен» сақтану шаралары жүріп жатыр
Маңғыстау облысы бойынша меншікті тілші
Дүниежүзілік денсаулық сақтау ұйымының мәліметі бойынша әлемде 1 500-дей адамнан «Маймыл шешегі» анықталыпты. Осы індеттен қалай сақтануға болатыны туралы тиісті мамандар түсіндірме жұмыстарын жүргізуде.
Маңғыстау бөлімшелік көліктегі санитарлық- эпидемиологиялық бақылау департаментіне қарас- ты санитарлық-карантиндік бақылау бөлімдері шетелдермен байланысы бар теміржол шекараларында Бейнеу және Болашақ станцияларында орналасқан. Жыл басынан бері Бейнеу арқылы көрші өзбек елінен 4539 адам шекарадан өткен. Өйткені, бүгінде аптасына үш рет Бейнеу-Нукус арасында жолаушы пойызы қатынап тұр. Басқарма мамандары, келген жолаушылардың барлығы жанаспайтын термометриядан өткізілетінін айтады. Қандай жағдай болмасын мамандардың эпидемияға қарсы іс-қимыл алгоритмі дайын. Ал Болашақ-Түркіменстан бағытында жолаушы тасымалы қазір болмағандықтан, бұл шаралар тек қандастар көші келгенде ғана қолданылады.
– Біз қазір теміржол мекемелеріне барып, «Маймыл шешегі» бойынша ақпараттық түсіндірме жұмыстарын жүргізіп жатырмыз. Бұл аурудың инкубациялық кезеңі 5-21 күн аралығын құрайды. Ауру белгілеріне келсек, қызудың көтерілуі, дененің ауруы, әлсіздік, бөртпе, құсу, лимфа түйіндерінің ұлғаюы, бас айналуы болады. Елімізде қазір мұндай дерт фактісі тіркелген жоқ, десек те, «сақтықта қорлық жоқ» дегендей, біліп жүрген артықтық етпейді. Маймыл шешегінің негізгі көзі – жабайы жануарлар, яғни приматтар мен кеміргіштер (тиін). Инфекция жұқтырған жануардың қанымен немесе оның биологиялық сұйықтықтарымен, сондай-ақ ауру жануардың етін пайдалану арқылы да пайда болуы мүмкін. Сондықтан шет елдерге жиі шығатын, шетелдермен байланысы бар адамдар аса сақ болғаны абзал, – дейді Маңғыстау бөлімшелік көліктегі санитарлық-эпидемиологиялық бақылау басқармасының бас маманы Жұмағаным Кенжалиева.