Маңғыстауда қауіпсіздік тақырыбына арналған суретші балалар сайысы өтті
Маңғыстау облысы бойынша меншікті тілші
Маңғыстау өңірінде «Қауіпсіздік палитрасы» тақырыбында теміржолшылар балаларының сурет сайысы өтті. Сурет байқауына 8-14 жас аралығындағы отыз шақты бала қатысты.
– Салалық теміржолшылар кәсіподақ ұйымының отыз жылдығына орай өткізілген бұл сайыс – балаларымызға қауіпсіздікті ұқтырып, өз өмірін сақтауға септігін тигізетін маңызды шара. Қатысқан балалардың еңбегін көріп қуандық. Тақырыпты түсінгендері көрініп тұр. Теміржол жанында доп ойнауға, жолдан жүруге, ортасында отыруға болмайтынын суреттепті. Олар ертең мұны достарына да айтып, теміржолда қауіпсіздікті сақтауға шақыратыны анық, – дейді Орталық теміржолшылар кәсіби одағының Маңғыстау өңіріндегі өкілі Әзірбай Тұрмағанбетов.
Сайыс қорытындысында балалар әр мекемеден келген топтар бойынша жеңімпаз атанып, бірінші, екінші және үшінші орындарға ие болды.Оларға диплом, сурет салу құралдары, ойыншық сияқты дүниелер табысталды. Кәсіподақ өкілі тағы бір қуанышты жаңалықпен бөлісті. Теміржолшылардың балалары биыл жазғы лагерьге баратын болды. Пандемия кезінде тоқтап қалған бұл жазғы демалыстың қайтадан ұйымдастырылып, жандануы шынында тамаша жаңалық еді.