Теміржолшылар жемқорлық мәселесін талқылады

Қызылорда темір жолында «Aманат» партиясы Теміржол филиалының ұйымдастыруымен «Жемқорлықты қалай жеңеміз?» деген тақырыпта кеңейтілген жиын өтті.

Жиынға Қызылорда теміржол бөлімшесіне қарасты мекемелердің басшылары, БПҰ төрағалары, белсенді партия мүшелері мен теміржолшылар қатысты.  

Партияның Теміржол филиалының атқарушы хатшысы Базара Танбаева жиынның мақсатымен таныстырып, теміржолшылар үшін жемқорлықпен күрес ең басты міндеттердің бірі екеніне тоқталды. Магистральдық желі бөлімшесінің басшысы Ибраким Басықараев, Жүк тасымалы қосалқы бөлімінің бас инженері Күлхан Белкібаев сөз алып, жемқорлыққа қарсы ҚТЖ басшылығы тарапынан берілген тапсырмалармен таныстырып, жағымсыз құбылысқа қарсы күресте бірлесіп жұмыс жасауға шақырды.  

Жиынға арнайы шақырылған Сыбайлас жемқорлыққа қарсы іс-қимыл агенттігі Қызылорда облысы бойынша департаментінің бас маманы Мұрат Ысқақов, Қызылорда станциясы желілік полиция бөлімінің полиция майоры Бағдат Маханов осы бағытта құқық қорғау органдарының жасап жатқан жұмыстарын ортаға салды. Сонымен қатар қоғамда сыбайлас жемқорлықтың кез келген көрінісіне мүлдем төзбеушілікті қалыптастыру, этикалық нормаларды бұзуға әкелетін және жемқорлық құбылыстарын туындататын жағдайлардың алдын алу бойынша түсіндірме жұмыстарын жүргізді.  

Теміржолшылардың құқықтық сауаттылығын арттыру мақсатында ұйымдастырылған жиында сөз алғандар әрбір адам оны өзінен бастап, кез келген құқықбұзушылыққа қарсы тұрып, оны болдырмауға тырысса, жемқорлық деген жегі құртты жеңуге болады деген қорытынды жасады.