Пойыздарды шұғыл тоқтатудан қандай шығын келетіні айтылды
Алматы өңірлік коммуникациялар қызметі алаңында темір жолдағы қауіпсіздік мәселелері бойынша брифинг өтті. Жиын барысында Алматы жол бөлімшесінің бас инженері Александр Игошен пойыздарды шұғыл тоқтату теміржол көлігінің жұмысына кері әсер ететінін айтты.
Балалардың теміржолдарда ойнауы және әлеуметтік желілер үшін роликтер түсіруі теміржолшыларды алаңдатып отыр.
«Пойыздың қозғалыс ырғағы адамдардың, малдың немесе автокөліктің болуы себебінен оқыс, жоспарсыз тоқтаған кезде үзіледі. Қозғалыста іркілістер орын алады, бұл орынсыз шығындарға әкеледі, оған қоса пойыздардың қозғалыс қауіпсіздігі бұзылады, ал автокөлікпен соқтығысқан кезде вагондар мен локомотивтер бүлінеді», - дейді А.Игошен.
Оның айтуынша, теміржол көлігі нысандарында бейнероликтер түсіру, құлаққаппен музыка тыңдау, әсіресе капюшонды киіп алып жүру өте қауіпті. Өйткені мұндай жағдайда локомотив беретін сигналдарды естімей қалады.
Теміржол бойындағы қауіпсіздік мәселесі жайлы баяндаған Александр Игошен алматылықтар мен қала қонақтарын теміржолдағы тәртіп ережелерін мүлтіксіз сақтауға шақырды.
«Мұқият және қырағы болу керек! Тек сонда ғана апаттың алдын алуға болады. Кез-келген адам теміржол көлігі нысандарында арнайы бөлінген орындарда: жабдықталған жаяу жүргіншілер өткелдері, тоннельдер, көпірлер, теміржол мен жол өткелдері арқылы кесіп өтуге тиіс. Теміржол рельстерін ыңғайлы жерде немесе уақытты үнемдеу үшін кесіп өтуге болмайды. Бұл өмірге қауіпті!»,-деді ол.