Биыл пойыздардың терезесіне тас лақтырудың 26 жағдайы тіркелді
«Қазақстан теміржолшысы» газетінің тілшісі
«ҚТЖ» ҰК» АҚ-да 2022-2024 жылдарға Қазақстан Республикасы темір жолдарында мүліктердің қауіпсіздігі мен сақталуы деңгейін арттыру бойынша Жол картасының орындалу нәтижелерін саралаған кезекті жиын өтті.
Оған ҚР ІІМ көліктегі полиция департаментінің және «ҚТЖ» ҰК» АҚ-ның құрылымдық бөлімшелерінің өкілдері қатысты. Жол картасында Шиелі және Шу станцияларындағы перрондарда тағамдарды бей-берекет түрде сатуды реттеу шаралары қарастырылған. Компанияның қозғалыс қауіпсіздігі департаментінің директоры Марат Шакенов бұл мәселені әкімдік және желілік тәртіп сақшыларымен бірлесе шешу қажеттілігін айтты. ҚТЖ кәсіпкерлер үшін қолайлы жағдай жасап, перрондарда сауда дүңгіршектерімен бірге бос алаңдар бөлуге дайын.
Отырыс барысында теміржолшылар құқық қорғау органдары өкілдерінен станциялардан өтіп бара жатқан жолаушылар пойыздарының терезелеріне тас лақтырып, бұзақылық жасайтын жасөспірімдердің әрекетіне тосқауыл қоюды өтінді. Жыл басынан бері осындай 26 жағдай орын алған. Ал 2018 жылдан бері сондай 260 факті тіркелген.
Жол картасы шеңберінде жолаушылар вагондарында, вагон-мейрамханаларда, вагон-барларда бейнекамералар орнатылуда. Бұл бейнекамералар полиция мониторына шығып отырады. Сонымен қатар тасымалданатын жүктерді дұрыс сақтау үшін бейнебақылау камералары кейбір теміржол станцияларында орнатылған. Теміржолшылар мен тәртіп сақшылары мұндай шаралар қылмыстар санын азайтуға септік етеді деп сенеді.
Темір жолда автокөліктер мен локомотивтердің соғысуы, адамдарды басып кетумен байланысты қайғылы оқиғаларды тіркеу үшін локомотивтерде бейне тіркегіш орнатылып жатыр. ҚТЖ өз күшімен темір жолда қараусыз қалған малдың, адамдардың жолға шығып кетуіне қарсы қоршаулар салуда. Осы ретте 26 станция мен жалпы ұзындығы 209 км болатын 2 перегонға қоршау салынды. Тағы 103 км жолды қоршау бойынша жобалық-сметалық құжаттар әзірленуде.