Жастар елуден астам қарт теміржолшыны құттықтады
«Қазақстан теміржолшысы» газетінің тілшісі
1 қазан – Қарттар күні. «Қазақстан темір жолы» ұлттық компаниясы атаулы күндері өз еңбеккерлерін назардан тыс қалдырған емес. Бұл жолы да компанияның еріктілері 50-ден астам қартты үйлеріне барып құттықтап, азық-түлік жиынтығын таратты, деп хабарлайды Rail-news.kz.
«Біз Біріккен көлік логистика компаниясымен тығыз байланыс жасап, әріптестік шеңберінде көптеген ізгілікті істердің атқарылуына ұйытқы болып келеміз. Бұл жолы да БКЛ компаниясы бізге қаржылық қолдау көрсетіп, теміржолдың елуден астам ардагері мен зейнеткеріне ұн, шай, сұйық май, сүт, жеміс-жидек, тағысын тағы күнделікті тұрмысқа қажет азық-түлік салынған пакеттерді таратып, қуаныш сыйлауға мүмкіндік берді. Әрине, көп жылғы еңбектерінің зейнетін көріп отырған қарт теміржолшылардың қуанышында шек болмады. Олар төл мерекелерін шын сезінді. Қамқорлық танытқан теміржолшы балаларына алғыстарын жаудырып, ақ тілек-баталарын жеткізді. «Алтын алма, алғыс ал» демекші, ізгілік іс жасауға қуана келіскен ерікті жастардың да көңілдері марқайып, жаны жадырады», – дейді Әлеуметтік саясат департаментінің бас менеджері Ақмарал Байғабылова.
