Теміржолшы қарияға құрмет көрсетілді
Мына суреттегі қария – 91 жастағы Өмірқұл Романқұлов. Арыс қаласында тұратын байырғы теміржолшы. Ал оның алдында отырған – Арыс қаласының әкімі Гүлжан Құрманбекова. Жуырда Халықаралық қарттар күніне орай қарияны құттықтап шаңырағына арнайы бас сұққан әкім үлкен кісінің батасын алды.
Мәдениет үйінде өткен мерекелік шараға қатыса алмаған қарттарды арнайы құттықтауды жөн көрген қала әкімі сый-сияпатымен арнайы барып, қариямен әңгіме-дүкен құрды. Амандық-саулық сұрасқан соң: «Қарағым, кімнің қызысың?», – деп сұрады бұл күнде көзі шала көріп, құлағы да сыр бере бастаған тоқсан жастағы қария.
«Мамыттың қызымын ғой, ата. Арыстың әкімімін. Сізді мерекемен құттықтап арнайы келдім», – деді әкім ханым ақсақалдың иығына шапан жауып жатып. «Е, шырағым, ғұмырлы бол, бәрекелді, әкеңді білем, өзіміздің ауылдың қызы екенсің ғой. Қартайғанда кімге керекпіз деп қамығамыз біз, ұмыт қалдырмай, елеп-ескергендеріңе рахмет. 41 жыл теміржолшы болып, ұл-қыз өсіріп, немере, шөбере сүйіп отырмыз. Сендерге де біздің жасымызды берсін, тоқсанға келіңдер, қане, жай алақаныңды...», – деп ақсақал әкімге батасын берді.
Өмірқұл ақсақалдың қызы Гүлмираның айтуынша, атамыз 1952 жылы Арыс вагон пайдалану депосына жұмысқа қабылданып, 1993 жылы сол мекемеден зейнеткерлікке шыққан. Өмірлік серігі Зейне анамыз екеуі 6 ұл, 2 қыз өсіріпті. Бүгінде сол алты ұлдың бесеуі – әке жолын қуған теміржолшы. Ұлдың үлкені Дәуітбек әкесін өкшелеп, зейнетке шығып үлгерген. Ал Бақытбек, Сейілбек, Құрманбек, Сапарбек және Оразбек теміржолда тер төгуде.
Өсіп-өнген әулеттің қазығы Өмірқұл қария 60-тан астам немере-шөберенің ортасында бақытты ғұмыр кешіп жатқан жайы бар. Өзі арқалап өсірген немерелердің орны бөлек, ал кейінгі шөбере, тіпті шөпшек дегендердің есім-сойын да біле бермейді екен. Мұны естіп жабыла күліп алдық. Ақиқатында, оның өзі бір бақыт сияқты...
Нұрлыбек ДОСЫБАЙ, Арыс қаласы