ҚТЖ төрағасы қызметкерлерді Республика күнімен құттықтады
Құрметті әріптестер! Сала ардагерлері!
Қазақстан Республикасының негізі қаланған күн – Республика күнімен баршаңызды шын жүректен құттықтауға рұқсат етіңіздер!
Қазақ КСР Жоғарғы Кеңесінің шешімімен 1990 жылғы 25 қазанда «ҚазКСР-нің мемлекеттік егемендігі туралы» декларация қабылданды. Еліміз егемендігін алған сол сәттен бастап тарихи дамуда үлкен серпіліс жасады. Қазіргі кезде қуатты әлеуетке ие мемлекет ретінде Қазақстан айтарлықтай табыстарға жетті. Реті келгенде ел экономикасының қарқынды дамуында темір жол саласының алар орны ерекше екендігін айтқым келеді.
Компания еліміздің транзиттік әлеуетін арттыруға және инфрақұрылымдық жобаларға арналған бағдарламаларды жүзеге асыруда үлкен үлес қосуда. Біз осымен тоқтап қалмаймыз. Алда әлі көптеген жоспарларымыз бар. Мемлекет басшысы Қасым-Жомарт Кемелұлы Тоқаев Қазақстан темір жолын ұлттық көлік-логистикалық корпорацияға айналдыру туралы міндет қойып отыр. Өз істеріңізге адалдықтарыңыз, біліктілік пен табандылықтарыңыз арқасында сол үдеден шығатынымызға сенім мол.
Осы айтулы мерекемен баршаңызды құттықтай отырып, дендеріңізге саулық, отбасыларыңызға амандық, елімізге бейбіт өмір тілеймін! Отанымыздың дамуы жолындағы еңбектеріңіз табысты болсын!
Нұрлан САУРАНБАЕВ,
«Қазақстан темір жолы» ҰК» АҚ Басқарма төрағасы