Көгершіндер көрмесінде үш теміржолшының кептері жоғары бағаға ие болды
Ақтөбе облысы бойынша меншікті тілші
Ақтөбелік Мұрат Сүндетбаевтың ерекше хоб- биі – көгершін өсіру. Бүгінде 100-ге жуық кептері бар. Жуырда Республика күні құрметіне өткен бейбітшілік символы – Көгершіндер көрмесінде теміржолшының қанаттылары жоғары баға алды.
Жайсаң дистанциясының аға электр механигі Мұрат Сүндетбаев аймақтық «Көгершіндер жәрмеңкесінде» ерекше хоббиімен көпшіліктің ықыласына бөленді. Ол ондаған жыл уақытын жұмсап, кептерден өз тұқымын шығарған. Көрмеде оның осы әдемі көгершіндері көпшіліктің ерекше сүйіспеншілігіне бөленіп, жүлде алды. Жұдырықтай құсты баладай мәпелеген теміржолшы кептерлерін «жүрегімнің бөлшегі» деп жақсы көреді.
«Көгершін – бейбітшілік символы. Ашық аспан астында қанат қағып, мың құбылып ойнайтын көгершіннің сұлулығын көп адам көре де, сезіне де бермейтіні өкінішті. Құстарым – жүрегімнің бір бөлшегі. Жұмыстан келгенде бірінші үйге кірмей, сарайға барып құстарымды көзіммен көріп, еркелетіп, сылап-сипап алмасам көңілім көншімейді. Соларды баптап, күтіп, шаршағанымды басамын», – дейді ол.
Мұрат Сүндетбаев отыз бес жылдан бері ШЧ-5 дистанциясында еңбек етеді, бүгінде аға электр механигі. Әдемі құстарының кекілін тарап, мамығын күтіп, қанатын қатайтуға машықтанған теміржолшы көгершіндері туралы сағаттап айтуға бар. Жүз шақты көгершіндерінің әрбірі – қайталанбас бірегей тұқым. Айтуынша, сарайында соңғы кездері сұлу өзбекстандық көгершіндер көбейген.
Көрмеде байқағанымыз, теміржолшылар арасында көгершін баптауды хоббиына айналдырғандар аз емес екен. Солардың бірі – Байбөрі Садықов Шалқар локомотив депосының ардагері. Оның 200-ге жуық кептері бар екен.
«Жауапкершілігі жоғары мамандық – теміржолшы болып та уақыт таптық. Кептер баптау – мен үшін жан рахаты, нағыз терапия», – дейді Байбөрі Садықов.
Көрмеде кезіктірген тағы бір теміржолшы Төремұрат Батырғарин кезінде Ақтөбе локомотив депосында бірінші класты машинист болған. 2017 жылы зейнетке шыққан соң кептер өсіруді біржола хоббиіне айналдырыпты. Теміржолшылар арасында көгершін өсірушілер клубын құруға бастама көтергендердің бірі екен. Құс сапасын жақсарту, олардың стандартын енгізу жайлы мәселе көтеріп, білгенімен бөлісіп жүрген жан.
«Ойын көгершіндері әдемі, бүгінде 80 құсым бар, бір айға 2 қапшық жем кетеді. Көгершінді пайдасынан гөрі хобби, демалыс үшін ұстаймыз», – дейді ардагер теміржолшы.
Ақтөбеде өткен көгершіндер көрмесінде үш теміржолшының да кептерлері үздік үштік қатарынан көрінді.