Шекарадағы Болашақ бекетіне жедел жәрдем көлігі жеткізілді
Маңғыстау облысы бойынша меншікті тілші
Болашақ станциясында жағымды жаңалық. Өткен аптада шекарадағы бекетке «жедел жәрдем» көлігі жеткізілді. Ауыл жұртының талай жыл сарғайып күткен арманы орындалды.
Енді ше, қанша жылдан бері ауырып-сырқаса, ауылда не дәрігер, не ауруханаға жеткізер жедел жәрдемі жоқ болашақтықтар риза болмай қайтсін?! Ауылда дәрігерлік амбулатория болғанымен онда тек бір ғана медбикеден басқа маман жоқ. Сондықтан басы ауырып, балтыры сыздаған тұрғындар Жаңаөзен қаласына немесе Ақтауға қатынауға мәжбүр. Ауылдағы амбулатория қызметі жолдама беруден әрі аспайтын. Енді қажет құрал-саймандарымен жабдықталған «жедел жәрдем» көлігі бар.
– Болашаққа жедел жәрдем көлігі ауадай қажет. Ауыл медбикесінен жолдама алып, дәрігерге бару үшін пойызбен жолға шығатын халық талай қиналатын. Ауруы асқынып, шұғыл медициналық қызмет көрсету қажет болған жағдайларда адам жанын сақтап қалу үшін амалсыздан науқасты жұмысшыларға арналған пойызға, жүк пойызына мінгізуге де тура келетін. Онымен ауруханаға жете алса бір сәрі, кейде аяғы ауыр келіншектер жолда, пойызда босанып қалатын жағдай көп. Жақында ғана, қыркүйек айында станция кезекшісінің әйелі толғатып, жүк пойызымен жөнелтіп жатқанбыз. Жете алмай жолда босанып қалды. Жанында ауыл медбикесі болды, сол кісі кіндігін кесіп босандырып алған. Ана да, бала да аман. Ал қырсығына айналса ше, беті аулақ... Сондықтан «103» көлігі келіп, қуанып жатырмыз. Қарақия ауданының әкімі өзінің есептік кездесуінде берген уәдесін орындады. Енді дәрігер жібереміз деп отыр. Медициналық тәртіп бойынша ауылға арнайы дәрігер бөлу үшін халық саны 2 мыңнан артық болу керек екен. Бізде 600-ден асады. Десе де, аудандық денсаулық сақтау бөлімінің басшысы ауылдың орталықтан қашықтығы, жол жоқтығы сияқты жайттарды ескере отырып, маманды өзге ауылдар штаты есебінен аламыз дегенді алға тартты, үміттеніп отырмыз, – дейді Болашақ станциясының бастығы Мақсат Нұрбеков.