Теміржолшылар мен желілік полицейлер суицид жасамақ болған әйелді құтқарып қалды
Ақтөбе облысы бойынша меншікті тілші
Тал түсте суицид жасауға оқталған келіншекті теміржол бойының тәртіп сақшылары құтқарды.
Оқиға Ақтөбе станциясы аумағында болған. Абырой болғанда секіруге оқталған келіншектің әрекеті уақытында хабарланған. Жүріп келе жатқан пойыз астына ұмтылған әйелді теміржолшылар мен желілік полицейлер тоқтатты.
«Оқиға орнына дереу келген полиция қызметкерлері Әділет Құрманбаев пен Шыңғыс Қамбарбеков әйелмен сөйлесіп, мұндай әрекеттен бас тартуға көндірді. Әйел полиция бөліміне жеткізіліп, оған алғашқы медициналық және психологиялық көмек көрсетілді», – дейді Көліктегі полиция департаментінің баспасөз қызметі.
Тексеру барысында өзіне қол жұмсамақ болған азаматшаның Ақтөбе қаласының тұрғыны екені анықталды. Қазір оқиға бойынша тергеу жүріп жатыр. Көлік сақшыларының айтуынша, теміржол бойында өз-өзіне қол жұмсауға оқталу әрекеті бірінші рет болып тұрған жоқ. Жыл басынан бері көлік сақшылары 3 рет суицид оқиғасының алдын алды.