Кадр саясатына жаңаша көзқарас
«Қазақстан теміржолшысы» газетінің тілшісі
«ҚТЖ» ҰК» АҚ-да New Ver кадрлық саясаты бастамаларын әзірлеу бойынша HR стратегиялық сессиясы өткізілді. Ұлттық компанияның топ-менеджерлері қатысқан іс-шара «HR қалай бизнес-әріптестік арқылы өзгерістер драйверіне айналады?» деп аталды.
Сессияны өткізуге HR саласында тәжірибесі мол сарапшы модератор Лариса Чистоедова шақырылды. Ол жиырма жылдан бері тренингтер/стратегиялық сессия өткізумен айналысып келеді. Арнайы сессияға компанияның аппарат басшысы Серік Кеулімжаев, бас инженер Батыр Котырев және басқа да департамент директорлары мен еншілес ұйымдар директорларының орынбасарлары қатысты. Қатысушылар негізгі HR басымдықтары, IR және ESG қағидаттары және EVP элементтері туралы талқылады.
– Бүгінгі таңда біздің компанияның алдында бірқатар стратегиялық міндеттер тұрғаны мәлім. Соның ішінде қызмет тиімділігін, еңбек өнімділігін және жұмысшылардың әлеуметтік-экономикалық жағдайын жақсартуға, IR және ESG қағидаттарын енгізуге бағытталған міндеттер бар. Осыған орай біз бүгін кадр саясатының басымдықтағы HR бағыттарын бірлесе әзірлеу үшін негізгі әріптестеріміз бен стейкхолдерлерімізді шақырып отырмыз, – деді Серік Кеулімжаев.
Сессия барысында сөз алған «ҚТЖ» ҰК» АҚ Адами ресурстарды басқару департаментінің директоры Сәуле Истлеева компанияның 2019-2029 жылдарға арналған стратегиялық мақсаттарына тоқталды.
– Стратегиялық мақсаттарымызға компанияны қаржылық тәуекел аймағынан шығару, қаржылық тұрақтылықты, жалпы тұрақты дамуды қамтамасыз ету, компания қызметінің тиімділігі мен клиенттер қанағаттанушылығын арттыру, пойыздар қозғалысы қауіпсіздігіне кепілдік беру жатады. Сонымен қатар негізгі НR бастамаларға келсек, компаниямыздың 2019-2029 жылдарға арналған кадр саясатына сәйкес, корпоративтік мәдениетті, көшбасшылықты, НR құзыреттілікті дамыту көзделіп отыр, – деді ол.
Ал 2023-2029 жылдарға арналған кадр саясаты бойынша, НR бизнес әріптестікті дамыту, ESG, яғни инклюзивтілік, дискриминацияға жол бермеу, гендерлік саясат мәселелері, НR процестерді оңтайландыру, таланттарды анықтау мәселелері қамтылған.
Сәуле Истлеева бұл бағыттағы жұмыстар туралы да баяндады. Оның айтуынша, өткен кадр саясаты НR құзыреттілігін дамытуға, корпоративтік мәдениетті диагностикалауға бағытталған болса, жаңа кадр саясаты IR және ESG қағидаттарын енгізуді қамтамасыз ететін құзыреттілік пен процестер арқылы жұмысшылардың әлеуметтік әл-ауқатын, қызмет тиімділігін арттыруды бірінші орынға шығарып отыр.