Теміржолшылар кентінде спорт және ойын алаңы ашылды
Абай облысы бойынша меншікті тілші
Балалар жылы аясында Семей ЖТ бөлімшесінде бірқатар игілікті шаралар жүзеге асырылды. Мысалы, желі бойындағы көптеген шағын станцияларға балалардың ойын алаңқайлары орнатылып, көпшілігі күрделі жөндеуден өтті. Балалар үшін танымдық, тағылымдық шаралар ұйымдастырылды.
Жуырда Семей шаһарының іргесіндегі Теміржолшылар кентінде жасанды футбол алаңы мен балалардың ойын алаңқайының ашылу салтанаты болды. Бұл аумақта негізінен теміржолшылар мен сала ардагерлері көп тұрады. Шаһардың шеткі ауданы болғандықтан жергілікті биліктің назарынан тыс қала беретіні де жасырын емес. Әйтсе де, Семей бөлімшесі кәсіподақ ұйымының төрағасы Алик Досановтың ықпалымен соңғы екі жылда бірқатар жұмыс жасалыпты. Бұл жолы да қуанышты оқиғаға аумақтағы барша балақайлар ата-аналарымен жиналды. Мердігер компания балалардың ойын алаңқайы мен жасанды футбол алаңын қыстың көзі қырауда да жұмыстарын тоқтатпай, дер кезінде бітіріп беріпті. Жаңа ойын алаңының «тұсауы» кесіліп, ақ кимешекті әжелер шашу шашты.
Жергілікті тұрғындар, сала ардагерлері осы шараға ұйытқы болған теміржолшыларға, кәсіподақ ұйымына алғыстарын жаудырып жатты. Ендігі жерде спортты серік еткен семейлік теміржолшы жастар да футбол алаңын жалға алмайды, жасанды алаң олардың игілігіне де арналған.