Дәстүрлі сурет байқауы басталды
«Қазақстан теміржолшысы» газетінің тілшісі
«ҚТЖ» ҰК» АҚ-да жылдағыдай «Балауса болашақ» балалар мен жасөспірімдердің онлайн сурет байқауы басталды. Оған компанияның Орталық аппараты мен еншілес ұйымдары қызметкерлерінің 7-14 жас аралығындағы балалары қатыса алады.
Байқауға балалар А4 және А3 форматында салған суреттерін жібереді. Жарысқа бейнелеу өнерінің кез-келген техникасын пайдалана отырып, қолмен, қарындашпен, фломастермен, гуашь, акварельмен және басқа материалдармен салынған суреттер қабылданады. 7-8 жастағы балалар суреттерін еркін тақырыпта салса болады. 9-11 жас аралығындағы балаларға «Қоршаған ортаға қамқорлық» тақырыбы беріледі. Ал 12-14 жастағы балалар «ҚТЖ – логистикалық транзиттік корпорация» тақырыбында салған суреттерін жолдайтын болады. Әр қатысушы екі суретке дейін жібере алады және JPEG немесе PNG форматында электронды түрде тапсырылуы тиіс. Ол үшін дайын суретті сканерлеу немесе суретке түсіру керек. Файл 5 мб-дан аспауы қажет. Сурет шетіне оның авторы туралы деректер жазылады: баланың аты-жөні, жасы, ата-анасының аты-жөні мен лауазымы, жұмыс орны, телефоны, тұрғылықты мекенжайы көрсетілуі керек. Суреттер 27 сәуірге дейін ғана қабылданады. Байқау қорытындысы биыл 27 мамырда шығарылады.