Еңбекті қорғау күнінде жарақат алған теміржолшыға көмек көрсетілді
Қызылорда облысы бойынша меншікті тілші
Дүниежүзілік Еңбекті қорғау күні қарсаңында Қызылорда электрмен жабдықтау дистанциясының кәсіподақ ұйымының төрағасы Дарханбек Мақсатов пен өндірістік оқыту шебері Жанболат Бекетовтер параолимпиада жүлдегері, ұжым есебінде тұратын Кенжебек Рахметәлиевтің отбасында болып, хал-жағдайымен танысты.
Кенжебек 2013 жылы өндірістік жұмыс кезінде тосын жағдайға ұшырап, екі қолынан жарақат алған.
Жарақат алған кезде дистанцияның Төретам телімінде электромонтер болып жұмыс істеген. Ол электр желілерінің тоқ күшінің жоғалу ақауын жөндеп жатқанда жарақат алған. Содан бері мекеменің зейнеткерлері есебінде. Теміржолшы Қуатбай Рахметәлиевтер отбасында дүниеге келген ол әке жолын жалғастырушы. Зейнетке шыққаннан бастап әріптестерінің қолдауымен және бапкері Өміржанның ықпалымен спортқа ден қойған. Қазіргі таңда Қазақстан Республикасында өткізілген спорт бәсекесінде топ жарып жүрген паратаеквондо шебері.
Әріптестерінің халін сұрай барған кәсіподақ өкілдері азық түлік себеті мен қаржылай көмек берді.
Өзін іздеп келген әріптестеріне разы болған, қайсар да жігерлі Кенжебек алғысын білдірді.
