«Саламатты Қазақстан» пойызы Шелек ауылының тұрғындарына қызмет көрсетті
«Саламатты Қазақстан» пойызының мамандары Алматы облысының Шелек ауылы тұрғындарына медициналық қызмет көрсетті, деп хабарлайды Rail-news.kz.
Jibek Joly телеарнасының мәліметінше, «Саламатты Қазақстан» пойызының үшінші келіп тоқтаған нүктесі Алматы қаласынан 120 шақырым жерде орналасқан Шелек станциясы болды. Станциада пойыз дәрігерлері ауыл тұрғындарын күні бойы қабылдады.
«УЗИ-ға түсіп, көз дәрігерінің, невропатолгтың және басқа да мамандардың қабылдауында болды. Мамандардың қызмет көрсетуіне риза болдым», – дейді Jibek Joly телеарнасының тілшісіне сұхбат берген станция тұрғындарының бірі.
Невропатолог Нұрлан Серікбайұлы елді мекен тұрғындарының 80-90 пайызы омыртқа ауруларымен келетіндігін айтады. Ал геноколог Әсел Бұқанбай кейбір ауыл келіншектерінің өзінің жүкті екендігін білмей бейқам жүретіндігін атап өтеді.
«Олар дер уақытында тексерілмегендіктен қандай ауруы бар екендігін де білмейді», – деді ол.
Естеріңізге сала кетейік, 26 сәуір күні «Алматы-2» теміржол вокзалынан «Саламатты «Қазақстан» пойызы» салтанатты түрде жолға шықты.
«Медициналық пойыз» жобасының басты мақсаты – еліміздің шалғай аудандарының тұрғындарына тегін медициналық көмек көрсету.
Жобаны «Самұрық-Қазына» АҚ компаниялар тобының атынан «Samruk-Kazyna Trust» әлеуметтік жобаларды дамыту қоры, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның және Денсаулық сақтау министрлігінің қатысуымен, «Қазақстан темір жолы» ҰК» АҚ жанындағы «Әлеуметтік жобалар қоры» корпоративтік қорымен және ақпараттық серіктес – Jibek Joly телеарнасымен бірге жүзеге асырады.
Дәрігерлер бригадасы халыққа барлық қызметті тегін көрсетеді.
Пойызда биохимиялық талдаулар жасап, ішкі ағзаларды ультрадыбыстық зерттеуден өткізуге мүмкіндік жасалған.