Балалар «Тау самалы» лагеріне аттанды
Тараз қаласы бойынша меншікті тілші
Биыл жазғы демалыста Жамбыл бөлімшесіне қарасты мекемелерде еңбек ететін теміржолшылардың 100 баласы лагерьге барады. Сәрсенбі күні олардың алғашқы легі аттанды.
Тараз вокзалынан аттанған 50 баланы ата-аналары шығарып салды. Жамбыл бөлімшесі кадрлар бөлімінің басшысы Меруерт Бейсенбекқызының айтуынша, 7-13 жас аралығындағы балалар Қаратау сілеміндегі табиғаты әсем Берікқара шатқалында орналасқан «Тау самалы» сауықтыру лагерінде 14 күн демалады. Кадр мен кәсіподақ қызметкерлері лагерьге алдын ала барып, ондағы балаларға жасалған жағдайды өз көздерімен көріп қайтыпты.
– Менің анам теміржолшы. Тараз станциясында еңбекті қорғау инженері. Лагерь туралы анамнан естіп, бірден баратынымды айттым. Екі апта каникулдың ең қызықты күндері болады, мен өзіме көп достар табамын деп ойлаймын, – дейді «AraiElit» гимназиясының 4-сынып оқушысы Арнат Өкен.
Шілде айының ортасында екінші лек демалысқа барады.