Ардагер – 100 жаста
Тараз қаласы бойынша меншікті тілші
Бар саналы ғұмырын Жамбыл теміржол ауруханасында өткізген Жамбыл бөлімшесінің ардагері Анна Землянская 100 жасқа толды. Мерейтой иесін Жамбыл бөлімшесі ардагерлер кеңесінің төрағасы Бауыржан Найманбаев бастаған әріптестері құттықтап барып, қуанышына ортақтасты.
Анна Землянская Ташкент медициналық институтын бітірген соң Жамбыл теміржол ауруханасына жолдамамен келген екен. Содан табан аудармастан ауруханада 52 жыл еңбек еткен.
– Ол жылдар керемет кезең еді ғой. Теміржол мекемелері бір атаның баласындай өте ұйымшыл еді. Тек теміржолшыларға қызмет көрсеткен соң өзімізді де теміржолшыдай сезінуші едік, жартылай әскери тәртіпке үйренген саланың өз қызығы мен шыжығы жетерлік еді, – деп еске алады өткен жылдарын ардагер.
Әріптесін құттықтай келген 84 жастағы Галина Правда мерейтой иесімен сонау 1977 жылдан бері жұмыс істегендерін айта келіп, Анна Кузьминичнаның дәрігер ретінде кәсіби біліктілігінің жоғары болғанын және адами болмысының биіктігіне тоқталды.
«Сіз біз үшін аңыз адам болып қаласыз. Жігеріңіз, кәсібіңізге деген махаббатыңыз біздерді өмірге ынталандыратын», – деп мерейтой иесіне гүл шоғын ұсынды.
Ал 1968 жылдан бері біздің кейіпкеріміз еңбек еткен бөлімнің меңгерушісі болған Бауыржан Найманбаев теміржолшылар атынан ардагерді құттықтап, тарту-таралғыларын жасады.
