Балалар экотурға қатысты
Абай облысы бойынша меншікті тілші
Биылғы жазғы каникул семейлік теміржолшылардың балақайлары үшін мейлінше қызықты өтуде. Бір ғана маусым айында олардың бір тобы оңтүстікте балалар лагерінде болып қайтса, енді бірі Астана шаһарында экотур ұйымдастырып, уақытты мейлінше тиімді өткізіп қайтты.
Аталмыш шараларға жергілікті салалық кәсіподақ ұйымы ұйытқы болған еді. Елордаға тек көпбалалы теміржолшылардың перзенттері ғана жол тартты. Небары үш күннің ішінде балалар бас қаланың ең көрікті жерлерін аралап, танымдық-тағылымдық мәні зор саяхат жасады. Атап айтсақ, Қазақстан Республикасының Ұлттық музейінде болып, ЭКСПО 2017 көрмесі өткен нысанды аралап шықты. Мұнымен қатар, еліміздегі бірегей саналатын океанариумда болып, тіпті бассейнге түсуге де уақыт тапты.
Әйтсе де, бүлдіршіндер үшін теплоходқа мініп, Есіл өзенінің бойымен жүзу қатты ұнапты. Сонымен қатар олар Астана төрінде арнайы кинофильм де тамашалады.
Балалар қала орталығындағы төрт жұлдызды «Қазжол» қонақүйінде демалып, үш күн қатарынан мейман болды. Олардың барлығы дерлік Астана шаһарына алғаш рет барған болатын. Сондықтан да осынау ұмытылмас әрі әсерлі сапар өмір бойы естерінде қалатыны анық.
Осынау орайда перзенттері үшін осындай тамаша әрі тартымды демалыс сәттерін сыйлағаны үшін Семей ЖТ басшылығы мен кәсіподақ ұйымына Семей және Өскемен өңірінің теміржолшы ата-аналары зор алғыс айтады.
