«Саламатты Қазақстан» медициналық пойызы Босаға станциясында

Қарағанды облысының тұрғындарына жоғары білікті медициналық көмек қолжетімді болып отыр. «Саламатты Қазақстан» медициналық пойызы Босаға стансасында тұрғындарды қабылдап жатыр, деп хабарлайды Rail-news.kz ҚазАқпаратқа сілтеме жасап.

«Саламатты Қазақстан» медициналық пойызы» әлеуметтік жобасын «Samruk-Kazyna Trust» әлеуметтік жобаларды дамыту қоры ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның және Денсаулық сақтау министрлігінің қатысуымен, «Әлеуметтік жобалар қоры» корпоративтік қорымен ынтымақтастықта жүзеге асырып отыр.

«Саламатты Қазақстан» әлеуметтік жобасының басты ақпараттық серіктесі – ҚР Президентінің телерадиокешені.

Биыл Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссияның қолдауымен алғаш рет азаматтардың мемлекеттік әлеуметтік қолдау, зейнетақы, жәрдемақы, әлеуметтік төлемдер және атаулы әлеуметтік көмек алу құқығын қорғау мәселесі бойынша тегін консультация беріліп келеді.

Медициналық пойыз Босаға станциясына 1 тамыз күні сағат 09:55-те келіп тоқтады.

Ал 2 тамыз күні сағат 22:00-де келесі станцияға аттанып кетеді.

Медициналық пойыздың бағыты медициналық кабинеті жоқ аймақтарды қамтиды.

Осылайша, биыл шалғайдағы елді мекен тұрғындары терапевт, стоматолог, офтальмолог, хирург, уролог, маммолог, педиатр және басқа да салалар бойынша тегін тексеруден өтіп, емделуге мүмкіндік алды.

Пойыз заманауи диагностикалық және емдік жабдықтармен, ультрадыбыстық, флюорографиялық аппаратпен, шағын операциялық бөлмемен, зертханамен жабдықталған. Одан бөлек, сымсыз интернет байланыс құралдарымен қамтылған.

«Саламатты Қазақстан» медициналық пойызының мамандары 26 сәуір мен 17 шілде аралығында Алматы, Павлодар, Ақмола, Солтүстік Қазақстан, Шығыс Қазақстан, Қостанай, Ұлытау, Жетісу және Абай облыстарының 47 стансасында тұрғындарға кәсіби медициналық, заңгерлік және медиативті көмек көрсетіп үлгерді.

Айта кетейік, 26 сәуірде Алматы-2 стансасынан басталған «Саламатты Қазақстан» медициналық пойызы 6 желтоқсанға дейін жүреді.

Пойыздың жүру кестесін «ҚТЖ – Жүк тасымалы» ЖШС бекіткен.

Медициналық пойыздың қазіргі кестесі медицина пунктері жоқ шалғай стансаларды, азаматтар мен мемлекеттік органдардың сұранысын ескере отырып жасалды.