«Мектепке жол» дәстүрлі акциясы басталды
Қызылорда облысы бойынша меншікті тілші
Қызылорда белгі беру және байланыс дистанциясы басшылығы мен кәсіподақ ұйымы «Мектепке жол» дәстүрлі акциясын бастап кетті. Олар биыл мектеп табалдырығын аттайтын 23 бүлдіршінге керек-жарақ толтырылған сөмке сыйлады.
Дистанцияның кәсіподақ ұйымының төрайымы Ғалия Қожахметованың айтуынша, бұл жолы мекеме жұмысшы-қызметкерлерінің мектептің бірінші сыныбына баратын 23 баласына сыйлық жасап отыр. Бұдан бөлек түрлі әлеуметтік санаттағы балалар үшін берілетін көмек компания басшылығы тарапынан белгіленіп, үлестірілетін болады.
– Жыл сайын компания бойынша қолға алынатын мектепке жол акциясына үн қосып, бірінші сыныпқа баратын балақайларға арнайы оқушы сөмкесін дайындаймыз. Биылғы акцияны ертерек бастап отырмыз, баласын мектепке дайындайтын ата-ана білу керек қой, не алып, не қоятынын, бір үйден бірнеше оқушы болуы мүмкін. Оларға ұжымдық келісім-шартқа сай тиісті жеңілдіктердің берілуін қадағалайтын боламыз, – дейді кәсіподақ төрайымы.
Айта кетейік, жыл сайын тамыз айында Қазақстан темір жолында «Мектепке жол» акциясы жүреді. Оның мақсаты теміржолшылар отбасының балаларын мектепке дайындауға атсалысу болып табылады.
