Самұрық сыйлаған сөмке (Фото)
Абай облысы бойынша меншікті тілші
Жаңа оқу жылының басталуына санаулы күндер қалған шақта шығыстағы теміржолшылар қауымы «Мектепке жол» акциясын қолға алды. Биылғы іс-шара жылдағы дәстүрден өзгерек болып отыр.
Себебі, осы жылғы қайырымдылық жұмыстарының бас демеушісі «Самұрық Қазына» АҚ өзінің 15 жылдығына орай күллі Абай облысында тұратын көпбалалы әрі аз қамтылған отбасылардың бірінші сыныпқа баратын балаларын мектепке қажетті оқу құралдарымен қамтып отыр.
Ал осы жауапты істі аз уақытта атқарып шығу семейлік теміржолшыларға жүктеліпті. Атап айтсақ, есімдері ұлттық компания бойынша «100 жас есімге» енген белсенділер бөлімшенің Жастар ұйымының төрайымы Арайлым Қосанова мен бөлімшенің өндірістік қауіпсіздік және экология бөлімінің жетекші инженері Бекзат Кәрімханов Абай облысына арнайы жіберілген керек-жарақтарды қабылдап алып, өңірлердегі мұқтаж отбасыларға таратып жатыр.
Сыйлықтың ішінде «Самрұқ Қазынаға» 15 жыл толуына орай арнайы эмблемасы бар рюкзак, түрлі түсті қағаздар мен қарындаштар, акварель, ермексаз бен оқушы дәптерлері және арнайы пенал, т.б. бар.
Бір ғана Абай облысы бойынша білім ордасы табалдырығын алғаш аттайтын 1603 балақайға тарту жасау көзделініпті. Бұл ретте семейлік еріктілер өткен апта бойы Семей қаласы мен шаһар маңайындағы іргелес елді мекендерді аралап, мектеп жабдықтарын үлестіріп шықты. Сыйлық алған отбасылар әр түрлі салада еңбек етеді екен.
– Күні кеше жаз айларында орман өртімен күрескен, негізінен орманшылар қауымы тұратын, шекара түбіндегі шағын ғана Талица ауылына ат басын тіредік. Бірінші сыныпқа небары он бала ғана барады екен. Бір қызығы, осы ауылдың барлық тұрғындары дерлік көпбалалы болып шықты. Әрқайсысында жетіден, бестен мектеп жасындағы балалар бар. Елеусіз жатқан шалғайдағы елді мекен халқының қуанышында шек болмады, – дейді бұл орайда Семей ЖТ бөлімшесінің өндірістік қауіпсіздік бөлімінің жетекші инженері Бекзат Нұрланұлы.
Қазіргі таңда Семей ЖТ бөлімшесінің бас кеңсесіне жеткізілген оқу құралдарын тарату ісі аяқталуға таяу. Семей өңірі бойынша шамамен екі жүздей ғана балақай қалыпты. Оларға керек-жарақтары осы аптаның ішінде толықтай табыс етілмек.
