Қарттар күніне орай ардегерлерге азық-түлік себеті таратылды
«Қазақстан теміржолшысы» газетінің тілшісі
1 қазан – Қарттар күніне орай Қазақстан теміржолының ерікті жастары сала ардагерлерінің үйіне барып, азық-түлік себеттерін таратты.
«ҚТЖ» ҰК» АҚ Әлеуметтік саясат департаментінің бас менеджері Замир Серіковтің айтуынша, олар бұл күнді жылдағыдай атаусыз қалдырмауға шешім қабылдап, Теміржол ардагерлерінің кеңесінен зейнет жасындағы бұрынғы теміржолшылардың тізімін сұратқан. Яғни, солардың ішінде әлеуметтік жағдайы жағынан қиындық көріп отырған қарттарды анықтаған. Ардагерлер кеңесі берген 55 қарияның үйіне барып, ең негізгі деген азық-түлік өнімдерінен тұратын себеттер апарған.
ҚТЖ-ның елу ерікті жас теміржолшысы «Ардагерлер қасымызда жүр» акциясына белсенді қатысты. Бір айта кетерлігі, мұндай акциялар «ҚТЖ-Жүк тасымалы» ЖШС-нің көптеген филиалдарында өтті. Атап айтқанда, елордадағы Астана локомотив пайдалану депосы ұжымы сала ардагерлерін мекемеге шақырып, мерекемен құттықтады. Депода бүгінде 410 зейнеткер мен зейнет жасына жеткенге дейін ҚТЖ-дан салалық жәрдемақы алатын 64 адам бар. Сол сияқты Тараздық теміржолшылар да өңірдегі көрнекті орындарды аралатып, зейнеткерлерге экскурсия ұйымдастырды. Кейбір филиалдарда шахматтан, дойбыдан турнир өткізіліп, қарт теміржолшыларға арналып дастархан жайылды, концерт ұйымдастырылды. Қазіргі таңда жалпы «ҚТЖЖүк тасымалы» ЖШС есебінде 20 мың зейнеткер мен 2 мыңнан астам салалық жәрдемақы алушы тіркеуде тұр.