Семей жүк тасымалы жұмысқа шақырады

Семей жүк тасымалы бөлімшесі ел шығысы бойынша ең озық үлгідегі әлеуметтік жеңілдіктер пакеті қарастырылған ірі жұмыс беруші саналады. Соңғы жылдары желі бойында өндіріс үдерісінің кеңеюіне байланысты бос қызмет орындарының саны арта түсуде.

Қазіргі күндері көбінесе маневр диспетчерлері, 1-2 класты станциялар бойынша кезекшілерге және жол шаруашылығының мамандарына сұраныс жоғары болып тұр. Яғни тасымалдауды, қозғалысты ұйымдастыру және теміржол көлігін пайдалану саласына қызметкерлер қажет. Сол тәрізді пойыз құрастырушылар, станция операторы, бағыттама бекетінің кезекшісі, парк бойынша кезекші сынды лауазымдарына да бос орындар жиі орын алып тұрады.  

Жуырда бөлімшенің кадр мамандары Абай облыстық Еңбек мобильділігі орталығы мен жергілікті «Amanat» партиясы филиалы бірлесіп өткізген «Жастарға жұмыс» атты бос орындар жәрмеңкесіне қатысып, лайықты кандидаттар қарастырды. Кадр бөлімінің мамандары «екі қолға бір күрек» іздеген қалың көпшілік арасынан да түсіндіру, ақпараттандыру жұмыстарын жүргізді. Мәселен, теміржол саласында еңбек еткісі келген жастарды бос жұмыс орындары қызықтырса, job.railways.kz немесе Enbek.kz сайтына кіру арқылы танысуларына болады. Сонымен қатар толығырақ ақпарат алу үшін Семей қаласы бойынша Мансап орталығына хабарласқандары жөн. Қосымша талаптар ретінде ішкі еңбек тәртібінің ережелерін білуі маңызды. Ақпарат алуға келген шамамен 400-дің үстіндегі адамға қажетті мағлұмат берілген.  

Жалпы, дәл бүгінгі күні аталған магистральдық желі бойынша Семей мен Өскемен өңірлерін қоса алғанда 151 бос жұмыс орны бар екен. Әсіресе жол монтері, жол бригадирі, кран машинисі, электромеханик сынды мамандықтарға сұраныс жоғары болып тұр. Сол тәрізді желі бойындағы көптеген станцияларда да бос жұмыс орындары байқалады. Қазіргі күні бірқатар қызметтерге жоғарыда аталған ғаламтор сайттарында арнайы конкурс жарияланған. Мәселен, Аягөздегі ТЧЭ-25 мекемесіне қарасты Шар ТД-17 мекемесінде 10 машинист көмекшісіне ваканттық орын бар. Оған барлығы 40 адам тілек білдірген. Оның тек біліктілігі бар 15-і ғана әңгімелесуге жолдама алыпты. Алда оларды тест сынағы күтіп тұр.