Медпойыз алты облысты аралады
«Қазақстан теміржолшысы» газетінің тілшісі
«Саламатты Қазақстан» медициналық пойызы биыл Қазақстанның 6 облысын аралап, 30 мыңнан астам адамға медициналық қызмет көрсетті.
Медпойыз Маңғыстау, Атырау, Ақтөбе, Батыс Қазақстан, Солтүстік Қазақстан және Ақмола облыстарындағы 48 станцияға аялдаған. Жоба аясында 10 мың баланы қоса алғанда барлығы 32 мың адам пойыздағы медицина мамандарына қаралды, сонымен қатар оларға 91 мыңнан астам медициналық қызмет көрсетілді. Соның ішінде стоматологиялық қызметтер, зертханалық зерттеулер, кішігірім хирургиялық оталар, ультрадыбыстық және рентгенологиялық зерттеулер бар.
Аурулардың ерте диагностикасы мен дер кезінде емделуіне ерекше назар аударылады. Қазіргі сәтте жүрек-қан тамырлары аурулары, қант диабеті және балалардың ауруларын қосқанда түрлі дертке шалдыққан 1933 науқас анықталды. 255 баланы қоса алғанда барлық науқастар тұрғылықты жері бойынша емханалардың тұрақты бақылауына алынды.
Жоба тек диагностикалау үшін ғана емес, сонымен бірге күрделі және төтенше жағдайда шұғыл медициналық көмек көрсетуде де маңызды болып шықты. Мәселен, Жақсы станциясында кардиологқа қаралған науқастың ауруын дер кезінде анықтау арқылы ол ажалдан аман қалды деуге болады. Оның бойында миокарда инфарктінің белгілері анықталып, дереу ауруханаға жатқызылды. Медициналық пойыз жабдықтарының арқасында қауіпті ауруларды жедел анықтап, шұғыл көмек көрсету мүмкін болды.
Медициналық пойыздың жұмысы жалғасуда, жыл соңына дейін Қазақстанның 11 облысындағы тағы 44 станцияны қамту көзделуде. Дәрігерлер құрамында педиатр, кардиолог, рентгенолог, хирург және басқаларын қоса алғанда 14 тар бейінді салалық маман бар.