2025 – жұмысшылар жылы
Еліміздің президенті Қасым-Жомарт Тоқаевтың Жарлығымен 2025 жыл жұмысшы мамандықтарының жылы болып жарияланды. Бұл тұрғыда еліміздегі еңбек саласындағы еңбегі ерен теміржол жұмысшыларының еңбегін ерекше атап өтуге тұрарлық.
Теміржол – ел экономикасының күретамыры. Оның үздіксіз жұмыс істеуі, қауіпсіздігі мен сапасы осы саладағы жұмысшылардың жанқиярлық еңбегінің арқасында қамтамасыз етіледі.
Теміржол саласындағы жұмысшылардың қатарында машинистер, жол жөндеушілер, диспетчерлер, вагон қараушылар, инженерлер және басқа да мамандық иелері бар. Әрқайсысы – елдің тасымал жүйесінің тұрақты жұмыс істеуіне өз үлесін қосып жүрген жандар. Олардың еңбегі тек техникалық білімді ғана емес, сонымен қатар жауапкершілікті, мұқияттылықты және қажырлы еңбекті талап етеді.
Машинистер – пойыздың жүрек қағысы. Олар жолаушылар мен жүк пойыздарының қауіпсіздігін қамтамасыз етеді. Қолайсыз ауа райы, ұзақ сапарлар, жоғары жауапкершілік – осының бәрі машинист жұмысының ажырамас бөлігі. Диспетчерлер – теміржол қозғалысының үйлесімділігін бақылайтын стратегтер. Олардың қателігі мыңдаған адамның өміріне қауіп төндіруі мүмкін, сондықтан бұл жұмыс жоғары зейін мен шапшаң шешім қабылдауды талап етеді.
Теміржолшылардың еңбегі тек физикалық жұмыс емес, сонымен қатар моральдық дайындықты да қажет етеді. Олар мереке күндері, тіпті түнгі уақытта да жұмыс істейді. Бұл жұмысшылардың арқасында адамдар өздерінің жақындарына аман-есен жетіп, жүктің уақытылы жеткізілуі қамтамасыз етіледі.
Жыл сайын теміржол саласындағы жұмысшылардың саны артып келеді. Бұл саланың дамуы жаңа технологиялар мен цифрландырудың арқасында жетілдірілуде. Дегенмен, заманауи технологиялар жұмысшылардың рөлін азайтпайды. Керісінше, олардың білімін жетілдіру мен кәсіби дамуға жол ашады. Қазіргі таңда «Қазақстан темір жолы» ұлттық компаниясы» АҚ-да 120 мыңнан астам адам жұмыс істеп жатқанын айта кеткен жөн.
Теміржол саласындағы жұмысшылардың еңбегін елеп, құрмет көрсету – баршамыздың борышымыз. Олар – еліміздің экономикалық тұрақтылығы мен қоғамның жайлылығын қамтамасыз ететін нағыз батырлар.