ҚТЖ-да донор күні өтті
«Қазақстан теміржолшысы» газетінің тілшісі
Биыл 77 жыл – 7 сәуірде ДДҰ Бүкіләлемдік Денсаулық күнін атап өтеді. Даталы күнге орай Магистральдық желі дирекциясында «Қазкөліккәсіп» ҚБ ұйымдастыруымен флешмоб пен донор күні ұйымдастырылды.
ҚТЖ кәсіподақтары құрылымдық бөлімшелермен бірге бұл күннің маңызы туралы ақпараттар беріп, насихат жұмыстарын жүргізеді. Сол арқылы қызметкерлерді салауатты өмір салтын сақтауға шақырады. ҚТЖ бас ғимаратының фойесінде шағын медициналық пункт ұйымдастырылып, мамандар теміржолшылардың қан қысымын, сатурациясын өлшеді, қан құрамындағы глюкоза, холестерин мөлшерін, жүрек жұмысын анықтады. Бұған қоса теміржолшылардың балалары арасында осы тақырыпқа байланысты сурет байқауы өткізілді.
Қызметкерлерге денсаулықты күтуге қатысты ДДҰ ұсынымдары айтылды. Бұл ұсынымдарда денсаулықтың басты кепілі – белсенді қимыл-қозғалыс екені жеткізілді. Себебі қимыл-қозғалыстың аздығы обыр, диабет, жүрек дерті сияқты ауруларды асқындырады. Жаһандық өлім-жітімнің ең басты себебі де осы – аз қимылдау. Сондықтан адам күніне кез келген қозғалысты жасап, көбірек жүріп, биге қатысып, спортпен айналысқаны жөн.
– ҚТЖ қашан да салауатты өмір салтын сақтау ұстанымын насихаттайды. Соған бағытталған іс-шаралар өте көп өтеді. Бүгін де міне аздап дене қимылын жасап, қолымызға денсаулық туралы плакат ұстап, әріптестеріміздің назарын осы күнге аударуға тырыстық. Сонымен қатар денсаулыққа пайдасы зор болғандықтан бір кәрзеңке көк алма таратылды. Бүгін донор күні, сондықтан науқастарға керегі болар деп қан тапсырып жатырмыз, – дейді Магистральдық желі дирекциясының қызметкері Дана Бигалимова.