Бақыттың кілті – еңбек пен сыйластықта

Астана аудандары арасында өткен «Ұрпақтар сабақтастығы» байқауында ардагер, Құрметті теміржолшы Кендай Ахметовтің отбасы бірінші орын алды. Бір жылдары теміржолшы әулеті «Мерейлі отбасы» байқауының жеңімпазы да болған еді.

Еңбек жолы атасынан бастау алған үлкен әулеттен 48 теміржолшы шыққан. Олардың жалпы еңбек өтілі – 1600 жыл. Кейіпкеріміз Кендай Ахметов 72 жыл ғұмырының 48 жылдай уақытын Сарышаған және Астана станцияларындағы ШЧ және ЭЧ мекемелерінде еңбек етуге арнаған. Жұбайы Күлән Ахметованы осы салада жұмыс істеп жүріп кездестіріп, 1975 жылы екі әріптес Сарышағанда бас құрап, төрт баланы дүниеге әкелді. Екеуі балаларын еңбекке баулып, өздерінің адамгершілік қасиеттерін олардың бойларына сіңіріп өсірді, осылайша елге абыройлы, көпке құрметті, ағайынға сыйлы, қоғамда танымал отбасына айналды.  

– Отбасы – шағын мемлекет. Оның өз заңдылықтары, қағидалары болады. Елінің қамын жейтін де, малын жейтін де ұрпақ сол шағын мемлекетте алған тәлім-тәрбиесіне қарай ер жетеді. Отбасын құрған алғашқы жылдары №4 бекет деген жерде 4 жылдай тұрдық. Сонда су түгілі нанды пойызбен әкеп беретін. Қиын кездер еді, ерлі-зайыпты болып бар қиындықты бірге көтердік. Бірақ ешқашан ешкімге шағым айтпадық. Темір жол отбасымызға берілген бір нәсіп еді, басқа салада мүлдем қызмет еткен жоқпын, тіпті ол туралы ой да кірмеді басыма, – дейді әулеттің отағасы.  

Ұл-қыздарынан тараған немере-жиендерінің қызығын көріп отырған ата мен әже бақыттың кілті еңбек пен сыйластықта екенін айтады. Өнегелі әулеттің үйінен қонақ үзілген емес. 2014 жылы «Мерейлі отбасы» байқауына қатысуға елорда әкімдігі тарапынан ұсыныс берілгенде туған-туыс, көрші-қолаңнан Ахметовтер туралы сұрастырылып, сырттай мінездеме жиналған. Сонда олар туралы бірде-бір теріс пікірдің болмауы мәлімет жинаушыларды таңғалдырыпты.  

– Жұбайым Күләнмен отасқаныма 40 жылдан асты. Үйде де, жұмыста да бір болдық. Менің күнделікті өмірімнің 60 пайызы жұмыста өтті, сондықтан көбіне бала тәрбиесіне жұбайым жауапты болды, дегенмен балаларыма қашан да уақыт табуға тырыстым. Әсіресе ұлымды 4 жасынан бастап жұмысқа бірге алып кетіп жүрдім. Оған жұмыстың да, өмірдің де қыр-сырын үйреттім. Қазір балам мен келінім бізге қарайласып, қыдыртып, барлық жағдайымызды жасап отыр. Міне, нағыз қазақы тәрбие деген осы, – дейді Кендай Ахметов.