“Саламатты Қазақстан” пойызы Атырау облысында мыңдаған адамға қызмет көрсетуде

«Саламатты Қазақстан» медициналық пойызы Атырауға ат басын тіреп, қызметін Ганюшкино станциясынан бастады. Мұнда олар бір күнде мыңға жуық адамға тегін мединалық көмек көрсетсе, бригада құрамындағы медиаторлар мен заңгерлер тұрғындарға құқықтық кеңестер берді.  

Жылжымалы құрамда сегіз вагонның төртеуі медициналық вагондар, онда әр түрлі медициналық құралдар мен дәрігер-мамандар бөлмесі, мамандар демалатын екі  купе вагон, вагон-мейрамхана және техникалық вагон бар. Купе-вагондарда ауа салқындатқыш, сондай-ақ пойызда душ, кір жуатын машина, тоңазытқыш қойылып, дәрігерлердің жұмыс істеуіне және демалуына барлық қолайлы жағдай жасалған.

Медицина пойызының аға дәрігері Әсемгүл Саханованың айтуынша, «Саламатты Қазақстан» медициналық пойызының көшпелі бригадалары соңғы бес-алты күнде Ганюшкино, Исатай, Нарын, Аққыстау станцияларының тұрғындарын қабылдап, қызмет көрсетті. Пойыздың құрамында 27 маман - медицина қызметкерлері және медиаторлар мен заңгерлер де бар. Медициналық пойыз кабинеттер ретінде жабдықталған және диагностикалық тексеруге және алғашқы медициналық көмек көрсету үшін қажетті заманауи медициналық жабдықтармен: ЭКГ, УДЗ аппараты, эндоскопиялық жабдық, гематологиялық және биохимиялық анализатор, Мерлин ультрадыбыстық сканері, флюорограф, гастрофиброскоп және басқалармен жарақталған 4 вагоннан тұрады. Дәрігерлер қатарында терапевт, хирург, педиатр, психолог, невропатолог, ультрадыбыстық диагностика маманы, жалпы тәжірибелік дәрігер, рентгенолог, кардиолог, стоматолог, офтальмолог, отоларинголог, педиатр, онколог-маммолог, гинеколог және урологн бар, барлығы 17 кабинет. Қажеттілікке қарай, мамандар кішігірім ота жасау қызметтерін көрсетіп, жоспарлы емдеуге жолдама береді.

«Осы күндер ішінде мыңдаған адам қаралды. Атыраулықтардың көп ауыратыны – тері аурулары екен, яғни дермотологиялық, псориазбен ауыратындар басым. Сосын аллергия, іш құрылысы аурулары, өтте тас жиналып қалу, бүйрек ауруы, көбінде қалқанша без үлкейіп кеткен (зоб), қант диабетімен ауыратындар үлкенде де, балаларда да баршылық. Буын аурулары да негізгі аурулардың бірі. Мұның бәрі әрине алдымен дұрыс тамақтанбау және өңірдегі экологияның нашарлығына да байланысты», - дейді аға дәрігер.  

Атырауға маусымның 6-да келген медициналық пойыз аймақта айдың ортасына дейін болады. Ганюшкино-Афанасьево, Исатай-Нарын, Аққыстау, Тұманды станцияларынан кейін Жамансор, Мұқыр, ең соңында маусымның 17-20 күндері Сағыз станциясында болады.