Балалар Бурабайға аттанды
"Қазақстан теміржолшысы" газетінің Жамбыл облысындағы меншікті тілшісі
Жаздың апшыны қуырған аптап ыстық күндері басталды. Күні кеше Шу станциясынан теміржолшылардың балалары жер жәннаты Көкшедегі «Жұлдызды Бурабай» лагеріне аттанды.
Шу локомотив пайдалану депосында жұмыс істейтін теміржолшылардың балалары Бурабай курортындағы лагерьде 15-24 маусым аралығында демалатын болады.
– Бурабайға алғашқы лекпен 19 бала жіберілді. Олар Көкшетаудың тамаша табиғатының аясында 10 күн демалып оралады. Екінші кезекте 25 маусым күні тағы 9 жеткіншек лагерьде демалуға барады. Ал 7 шілдеден бастап, он күнге 19 бала Жуалы ауданындағы «Тау самалы» лагеріне аттанбақ. Осы демалыс орталығына 24 шілдеге тағы 24 жасөспірімге жолдама бердік. Жолдама бөлерде кәсіподақ ұйымы алдымен көпбалалы отбасыларға басымдық берді, - дейді Шу локомотив пайдалану депосының бастығы Медет Қайыржанұлы.
Теміржолшылардың балалары жыл сайын әке-шешелері еңбек ететін кәсіпорын есебінен тегін жолдамамен лагерьде демалуы дәстүрге айналған. Бұл демалыс жас жеткіншектерге тынығып, денсаулығын шыңдаудан бөлек, танымдық көкжиегін кеңейтуге мүмкіндік беріп, естен кетпес тамаша әсер сыйлайтыны анық.