Айназдың алғашқы жеңісі

«ҚТЖ» ҰК» АҚ –  Әлеуметтік саясат департаменті өткізген балалар мен жасөспірімдер арасындағы «Балауса болашақ» онлайн сурет байқауынан он жасар атыраулық балдырған жүлдегер атанды.

Байқауға компанияның орталық аппараты, филиалдары мен еншілес ұйымдары қызметкерлерінің 7 жастан 14 жасқа дейінгі балалары мен немерелері қатысты.    

Теміржолшы мамандығын жас ұрпаққа насихаттауды мақсат тұтқан байқауға суреттерді қабылдау осы жылдың 25 сәуіріне дейін жүргізілді. Жуырда осы байқаудың қорытындысы жарияланып, екі жүзден астам баланың ішінен атыраулық теміржолшы Ибраимов Рақымжанның қызы Айназ жүлделі 3-ші орынды иеленді. Әкесінің айтуынша, Айназ сурет салумен балабақшадан бастап әуестенген.  Биыл 10 жасқа толған ол бастауыш сыныпты бітірді.  

Аталған байқауға ол «Ұлы Жеңіске 80 жыл» тақырыбына салған суретін ұсынып, нәтижесінде жеңімпаз атанды. Оның сурет салу бейіміне  анасы, биология пәнінің мұғалімі Мұқамбетқалиева Самалдың да ықпалы болғаны анық.  «Айназ бірінші сыныпқа барған кезден бастап сурет салу үйірмесіне де қатысып жүрді. Ол көбіне ғажайып әлем тақырыбында сурет салғанды ұнатады. Өзінің қиялындағы образдарды қарындаш-бояумен қағаз бетіне түсіреді. Анасы да сурет салғанды ұнатады, қолы босағанда айналысатын хоббиі десе де болғандай» дейді әкесі Рақымжан. Айназға 3-ші дәрежелі диплом мен арнайы сыйлығын Атырау магистральдық желі бөлімшесінің директоры Аралбай Қосымбаев табыс етіп, бүлдіршінге алда да шығармашылық шабыт, биік жетістіктер тіледі.  

Айназ теміржолшының немересі және қызы. Атасы Жаманшиев Ибраим Құлсары жол дистанциясында еңбек еткен,  бүгінде зейнеткер, «Құрметті теміржолшы» атағының иегері, Ауған соғысының ардагері. Ал әкесі Рақымжан Жаманшиев Құлсары сигнализация және байланыс дистанциясында еңбек қорғау және экология жетекші инженері болып жұмыс істеп жүр. Ол қызының жүлделі орын алғанына дән риза және теміржолшылардың баларына арнап байқау ұйымдастырған ҚТЖ басшылығына алғысын білдіреді.