Жаз жайнатып, күн күлдірген...
Атырау облысы бойынша меншікті тілші
Атырауда күн жанып тұр. Әрине, шілденің қырық градус ыстығына қара- мастан теміржолшылар желі бойында еңбек көрігін қыздыруда. Ал олардың балалары үшін жаз қызығы басталған.
8 шілде күні Атырау магистральдық желі бөлімшесіне қарасты мекемелерде еңбек ететін теміржолшылардың 60 баласы 8 пойызбен Шымкенттегі «Көктерек» сауықтыру лагеріне аттанды. Атап айтқанда, Атырау және Құлсары жол дистанцияларынан – 25, ШЧ 8, 9, 11-дистанцияларынан – 20, Атырау электрмен жабдықтау дистанциясынан – 5, басқару аппараты, т.б. қосалқы шаруашылықтардан 10 бала оңтүстіктің саялы табиғатында қоныс тепкен сауықтыру лагерінде 10 күн демалады. Балалардың жасы 7-14 жас аралығын қамтиды. Арасында көпбалалы және аз қамтылған отбасылардан шыққан балалар да бар.
«Ата-аналар балаларын жазғы лагерлерге жіберуге асығады. Бұл жерде олар көңілді, қызықты уақыт өткізеді. Әр күнге жоспарланған қызықты мерекелік іс-шаралар әзірленіп, спорттық, басқа да ойындар, түрлі экскурсиялар, байқаулар да өтеді. Бір сөзбен айтқанда, бұл шынымен де жаз жайнатып, күн күлдірген жайлы демалыс болмақ»,- дейді Атырау магистральдық желі бөлімшесі персоналды басқару бөлімінің бастығы Анар Жалғасбаева.