Теміржолшылар балаларының жазғы демалысы жалғасуда
"Қазақстан теміржолшысы" газетінің Жамбыл облысындағы меншікті тілшісі
Тамыз – жаздың соңғы айы, мектеп оқушылары үшін 3 ай каникулдың аяқталуына да санаулы күн уақыт қалды. Алда мектепке қызу дайындыққа кірісетін күндер тұр. Десек те, Жамбыл теміржолшыларының төртінші маусымда демалып жатқан балалары үшін жаз қызығы жалғасуда.
Жамбыл жүк тасымалы бөлімшесі кадр бөлімінің маманы Қымбат Ақжолова берген мәліметке сүйенсек, теміржолшылардың балалары екі сауықтыру лагерінде демалып жатыр. Бірі – Көкше жеріндегі Бурабай демалыс аймағындағы балалар лагері болса, екіншісі – Жуалы ауданындағы тау бөктерінде орналасқан «Тау самалы» сауықтыру орталығы.
– Филиалға қарасты барлық бөлімшелер түгел қамтылды. Ең бірінші кезекте көпбалалы отбасыларға басымдық берілді. Сарышаған, Түркісіб, Шу, Тараздағы құрылымдық мекемелер жұмысшыларының балалары Бурабайға барып демалды. Қаратау, Жаңатас, Тараз, Шудағы теміржолшылардың балаларына «Тау самалы» лагеріне жолдама берілді. Жалпы лагерьдегі демалыстың төрт маусымында 120-дан астам оқушы тартылды, – дейді Қымбат Амангелдіқызы.
Қай сауықтыру орталығына барса да, балалардың қауіпсіздігін қадағалайтын жетекші бекітіліп беріледі. Олардың жол шығыны мен қауіпсіздігінен бөлек, жол үстіндегі тамағы мен сусыны, т.т. бәрі шешілген.