Мектепке жол: оқу құралдары сыйға тартылды
Абай облысы бойынша меншікті тілші
Семей ЖТ бөлімшесі қызметкерлерінің мектеп табалдырығын алғаш аттайтын бүлдіршіндеріне арналған іс-шара өтті. Республикалық «Мектепке жол» акциясы аясындағы осынау қайырымдылық шарасын бөлімшенің кәсіподақ ұйымы ұйымдастырды.
Бұл күні бөлімшенің бас ғимараты алдына желі бойынан кіл алты жастағы балақайлар мол жиналды. Салтанатты шараның беташар рәсімінде филиал директорының қаржы және экономика бойынша орынбасары Жанар Құрманғалиева, НЖС-6 басшысының орынбасары Дәурен Нұрланұлы және «Қазкөліккәсіп» ҚБ Семей өңірі бойынша өкілі Есен Қажығұлов құттықтау сөз алып, алдағы жаңа оқу жылында мектеп табалдырығын аттайтын бүлдіршіндерге ақ жол тілеп, жылы лебіздерін білдірді.
Іс-шара бүлдіршіндер үшін мейлінше қызықты болды. Олар үшін аниматорлар өнер көрсетті. Ойыншықтар әлемінен келген кейіпкер Лабубу бөбектер арасында түрлі ойындар мен қызықты спорттық сайыстар ұйымдастырды.
Нәтижесінде уақытты көңілді өткізген барлық балақай үздік атанып, түрлі ойыншықтар мен тәттілерді сыйлыққа алды. Сондай-ақ теміржолшылардың мектеп жасындағы өнерпаз балалары ән шырқады.
Ал алғаш мектеп табалдырығын аттайтын бүлдіршіндер кәсіподақ тарапынан арнайы әзірленген сөмкелер иеленді. Қажетті оқу құралдары мен бірінші сынып оқушыларына арналған жабдықтар толтырылған сөмке 100-ге жуық балаға таратылды. Теміржолшылар осындай игілікті іс-шараны ұйымдастырғансалалық кәсіподақұйымына алғыс айтып, ризашылықтарын білдірді.
Балақайларға да, олардың ата-аналарына да ерекше көңіл күй сыйлаған осынау іс-шараның соңында барша жиналған қауым естелік ретінде баннер алдында естелік суретке түсті.
