Дүниежүзілік жүрек күні: ҚТЖ-да профилактикалық акция өтті
«Қазақстан теміржолшысы» газетінің тілшісі
29 қыркүйек – Дүниежүзілік жүрек күні шеңберінде «ҚТЖ» ҰК» АҚ-да «Archimedes Medical Group», «International Clinic of Asia», «Медикер – өнеркәсіптік медицина» ЖШС қызметкерлерінің қатысуымен арнайы іс-шара өтті.
«Іс-шараның мақсаты – Компания қызметкерлерінің жүрек-қан тамырлары ауруларына байланысты проблемалар туралы хабардарлығын арттыру, сондай-ақ олардың алдын алу және ерте анықтау бойынша ұсыныстар беру», – дейді іс-шараны ұйымдастырушылар қатарында кәсіподақ өкілдері.
Іс-шара аясында бірнеше акция өтті. Мәселен, «Қан қысымыңызды өлшеңіз» акциясы барысында сала қызметкерлерінің қан қысымы тонометр арқылы иық артериясында өлшенді. «Холестеринді біл», «Қантыңды біл» акциялары аясында қатысушылар саусақтан қан тапсыру арқылы холестерин мен қант өлшемін білу мүмкіндігіне ие болды. «Өз ЭКГны біл» акциясы аясында «Archimedes Medical Group» ЖШС дәрігерлері қатысушыларды ЭКГ-дан өткізіп, кардиограмма жазбалары бойынша кеңестер берді.
Сонымен қатар түстен кейін семинар сабағы өткізіліп, онда медицина қызметкерлері алғашқы шұғыл көмек көрсетуді үйретіп, жүрек-қан тамырлары ауруларының алдын алу бойынша дәріс оқыды.