Жастардың жанды бастамасы

Семейлік ерікті жастар жыл соңында бірқатар әлеуметтік іс-шаралар ұйымдастыруды қолға алды. Соның ішінде «ҚТЖ» ҰК» АҚ бастамасымен қолға алынған корпоративтік волонтерлер байқауының алар орны ерекше болып тұр.  

Бөлімше жастары бұл байқауға «Балаларға қамқорлық» номинациясы бойынша қатысып жатыр. Жаңа-Семей станциясының жастары бірқатар тың жобаларды қолға алып, бастап та кетті. Қайырымдылық шарасының басты мақсаты – әлеуметтік аз қамтылған отбасыларға көмек, соның ішінде балалардың игілігіне жағдай жасап, олардың жан-жақты дамуына қолдау көрсету және қауіпсіз орта қалыптастыру.

Станцияның техникалық контор операторы Диана Қапанова мен багажды қабылдап-тапсырушы Тамерлан Шаданов бастаған ерікті жастар Семейдегі «Аналар үйіне» арнайы барып қайтты. Қыз-жігіттер бұл әлеуметтік мекемеге алдын ала хабарласып, мұқтаж жандар мен қажетті заттар тізімін алған болатын. Олар  бүлдіршінге қыстық аяқ киімдер, өзге де жылы киім-кешектер мен азық-түлік, балалар тағамдарын алып барды. Тағдыр тауқыметіне тап болған балақайлар үшін тәттілер мен түрлі дамытатын ойыншықтар алуды да ұмытпапты. Жүрек жылуына зәру бүлдіршіндерді ойнатуға да уақыт тапты. Теміржолшылардың келгеніне қамкөңіл аналар мен олардың сәбилері үлкен қуаныш білдіріп, жастар мен басшылыққа алғыстарын айтты.

– Станция ұжымы ұлттық компания көлемінде орын алып жатқан әрбір әлеуметтік акцияға үнемі үн қосып келеді. Қоғамдық іс-шараларда белсенділік танытып жүрген жастарымыз корпоративтік волонтерлар байқауына да қатысып жатыр. Олар балалардың болашағының жарқын болуы жолындағы әр бастамаға қолдау білдіріп келеді, – дейді Жаңа-Семей станциясының бастығы Дәулет Сүлейменов.

Станция жастары таяу аралықта қаладағы балалар үйіне барып, әлеуметтік акция ұйымдастыруды көздеп отыр.