Рамазан – сауап айы
Атырау облысы бойынша меншікті тілші
Қасиетті Рамазан айында садақа беріп, қайырымдылық жасау – ең сауапты да қайырлы істердің бірі. Атырау магистральдық желі бөлімшесінде «Жақсылық жасап жарысайық!» атты қайырымдылық акциясы ұйымдастырылды.
«Жүректен жүрекке!» деген ұранмен өткен қайырымдылық акциясына атсалысқандар қатары көп болды. Бөлімшенің персоналды басқару бөлімінің бастығы Анар Жалғасбаеваның айтуынша, әркім өз мүмкіндігіне қарай үлес қосқан, біреулер үйінен зат әкеліп қосса, енді біреулер балалар үйіне – ойыншықтар мен кітаптар, тәттілер, қарттар үйіне, мүмкіндігі шектеулі жандар орталығына және «Шапағат» мүгедектер қоғамына – азық-түлік, күнделікті қажетті заттар, жалғызбасты зейнеткерлерге – тұрмысқа қажетті бұйымдар, көпбалалы отбасыларға азық-түлік, киім-кешек, оқу құралдарын әкеліп қосқан.
Бөлімше басшысы Аралбай Аманбаев: «Әрбір көмек, әрбір қолдау біреудің өміріне үміт пен қуаныш сыйлайды. Бұл біздің үлкен ұжымдағы бірліктің белгісі. Жасаған әр игі істеріңіз өздеріңізге еселеніп қайтады» деп акцияны қолдаушылар қатарынан табылды. Акцияға бөлімшенің басқару аппараты, жол, электр және байланыс дистанциялары, станциялар, басқа да құрылымдық бөлімшелерден 200-ден аса қызметкер қатысып, жиналған заттар адресаттарға жеткізіліп, иелеріне табысталды.