Наурызнама онкүндігі аясында қайырымдылық акциясы өтті
"Қазақстан теміржолшысы" газетінің Жамбыл облысындағы меншікті тілшісі
Жамбыл локомотив пайдалану депосының ұжымы ізгілік пен мейірім мерекесі – Ұлыстың ұлы күнін Наурызнама онкүндігінің аясында әр күнді мерекелік іс-шаралармен өткізді.
15 наурыз – Қайырымдылық күніне орай көпбалалы отбасыларға азық-түлік себетін таратты. Акцияға депо бастығының пайдалану жөніндегі орынбасары Мәди Қонысбаев бастаған мамандар түгел үлестерін қосып, күнделікті тұтынатын азық-түлік сатып алып, әлеуметтік қолдауды қажет ететін отбасыларға көмек көрсетті.
– Наурызнама – бұл мерекелік іс-шаралар ғана емес. Ғұрыптық дәстүрлерді жаңғырту, қоғамды ізгілікке үндеу. Ұлыстың ұлы күнін тойлаудың тарихи мәнін жас ұрпаққа өнеге етіп көрсету. Әр күннің өзіндік мазмұны бар. Табиғатты қорғау, адамдарды жақсылық жасауға, үлкенге құрмет, кішіге қамқорлық көрсетуге үндейді, – дейді Мәди Қонысбаев.
Ұлттық құндылықтарды дәріптеу, қоғамдағы татулықты күшейту және әр күнді белгілі бір мазмұнмен атап өтуді мақсат тұтқан Наурызнама онкүндігі аясындағы іс-шаралар Жамбыл локомотив пайдалану депосында ай бойы жалғаса бермек.