Семейлік теміржолшылардың балалары Бурабайға жол тартты
Абай облысы бойынша меншікті тілші
Семейлік теміржолшылардың балалары үшін жазғы лагерь маусымы ресми түрде бастау алды. Аталған іс-шара әлеуметтік пакет шеңберінде және ұжымдық шартқа сәйкес жүзеге асырылуда.
Жуырда Семей ЖТ бөлімшесі филиалы қызметкерлерінің балалары еліміздің ең көрікті өңірлерінің бірі – Бурабай курорттық аймағына, ондағы «Орман ертегісі» балалар сауықтыру лагеріне аттанды. Балақайларды Семей теміржол бекетінен шығарып салуға олардың ата-аналары да жиналған болатын. Астана шаһарына дейін апаратын «Нұрлы жол» – Семей пойызының 11-ші вагонының алдына жиналғандардың қарасы көп болды. Оларды бастап алып жүрген Семей ЖТ бөлімшесі филиалы кәсіподақ ұйымы төрайымы Айгүл Берікболова сапар барысын түсіндіріп, нұсқаулықпен таныстырды.
Осылайша бір жарым тәулікке жетпейтін уақыт ішінде барша балақай діттеген жерге аман-есен, еш қиындықсыз жетіп үлгерді.
– Лагеріміз жасыл орманның ішінде, жанға жайлы жерде. Балалардың қауіпсіздігіне, теңгерімді тамақтануына және мазмұнды демалысына ерекше назар аударылып, олардың жайлы әрі толыққанды демалуына барлық жағдай жасалған. Уақытты мейлінше көңілді өткізіп жатыр, – дейді бұл ретте Айгүл Мырзағалиқызы.
Балақайлар денсаулықтарын шыңдап, уақытты мейлінше тиімді өткізуде. Айта кетерлігі, бұл биылғы лагерьге аттанып отырған алғашқы лек саналады. Алдағы тамыз айына дейін балалар мен жасөспірімдерден құралған тағы екі үлкен топ жетекшілерімен бірге еліміздің өзге өңірлеріне жол тартатын болады.
