Тағы екі жүз бала демалады
Маңғыстау облысы бойынша меншікті тілші
Маңғыстау теміржолшыларының балалары жаздың рахатын көруде. Жақында бір топ бала Ақтау қаласының Каспий теңізі жағалауындағы «Еркемай» демалыс лагеріне аттанды.
Оларға демалыс орны 22-31 шілде аралығында қызмет көрсетсе, тамыз айының басында дәл осы лагерь түбек теміржолшыларының тағы да жүз баласын қабылдайды.
Балалардың мектеп демалысындағы қызыққа толы күндерінің жалғасы 14-23 тамыз аралығында Ақмола облысындағы «Зеренді» демалыс орнында ұйымдастырылады. Пойызбен солтүстік өңірге саяхат ретінде де естен кетпестен әсер қалдыратын бұл лагерьге жүз баланы жіберу жоспарланған.
– 22 шілде күні түбектегі түрлі құрылымдық мекемелер бойынша теміржолшылардың жалпы саны екі жүз баласы сауықтыру орындарына жіберілді. Оның ішінде біздің Маңғыстау жол дистанциясынан елу шақты бала кетті. Біз бірінші кезекте ауыр жұмыс атқаратын жұмысшылар отбасында тәрбиеленіп жатқан 7-13 жас аралығындағы ұл-қыздарды іріктеп алдық. Өзіміз алып барып, лагерьдегі жағдайды, күн тәртібі мен тамақтануларын көріп қайттық. Бұл – Ақтау қаласындағы біраз жылдан бері бала қабылдап, қызмет көрсетіп келе жатқан сауықтыру орны. Сондықтан жағдайға көңіліміз толды, – дейді Маңғыстау жол дистанциясының бірінші санатты технигі Шынар Кошманова.