Инклюзия күні: теміржолшылар ерекше балалармен баскетбол алаңында кездесті
«Қазақстан теміржолшысы» газетінің тілшісі
«Самұрықнама: 20 игі іс» акциясы аясында «ҚТЖ» ҰК» АҚ компаниялар тобында Инклюзия күні өтті. ҚТЖ баскетбол құрама командасы «Жанасу» қайырымдылық қорының «Біргеміз» балалар баскетбол командасымен бірлескен жаттығу өткізді.
– Спорт адамдарды біріктіреді, ал игі істер назар мен қолдаудан басталады. Әр адам өзін үлкен команданың бір бөлігі ретінде сезінуі маңызды, осы мақсатта компанияның Әлеуметтік саясат департаменті бүгінгі жаттығуды ұйымдастырып отыр, – дейді аталған департаменттің бас менеджері Дастан Журкабаев.
Сонымен қатар 22 қыркүйек – Инклюзия күніне орай «Самұрық-Қазына» тобы компанияларының жастары, соның ішінде ҚТЖ қызметкерлері Астана қаласындағы №76 мектеп-лицейіне барып, ерекше білім беру қажеттіліктері бар балалармен жүздесті. Жастар балалармен бірге уақыт өткізіп, өзара қарым-қатынас жасап, мектептегі инклюзия кабинетімен танысты. Сондай-ақ мектеп басшылығымен кездесіп, инклюзивті білім беру бағытындағы жұмыстарды талқылады, балаларға арнайы сыйлықтар табыстады.
– Инклюзия – әр балаға мүмкіндік пен қолдау көрсету. Инклюзивті білім беру – тек білім беру саласының ғана емес, бүкіл қоғамның дамуына ықпал ететін маңызды бағыт. Әрбір оқушының ерекше екенін мойындап, барлығына тең мүмкіндік беру – болашақтың негізі. Осындай жағдай жасап отырғын білім ордасының ұжымына алғысымызды білдірдік. Ерекше балалардың бойындағы өнері мен талантына тәнті болдық. Осындай маңызды істе бәріміз бірге болайық, бірге қолдайық, – дейді ҚТЖ-ның Әлеуметтік саясат департаментінің менеджері Ержан Жаналиев.
Еліміздің түкпір-түкпірінде «Самұрықнама: 20 игі іс» акциясы аясында ізгі бастамаларға ұласатын 20 күндік марафон өтуде. 20 қыркүйек пен 13 қазан аралығында «Самұрық-Қазына» тобының қызметкерлері ел көлемінде экологиялық, әлеуметтік, білім беру және қайырымдылық бағыттарында 20 игі істі жүзеге асырады. Бұл игі істер – табиғатты қорғау және көгалдандыру, инклюзия мен аға буынды қолдау, білім беру және кәсіби бағдар, цифрлық сауаттылық пен қауіпсіздік, көмекке мұқтаж жандарға қолдау көрсету бағытында болады.