Мәскеу мерейтойына қатысты
Түрксіб теміржолының бүгінгі мұрагері саналатын Семей ЖТ бөлімшесінде салалық ардагерлер кеңесі белсенді түрде жұмыс жүргізуде. Тек теміржол көлемінде ғана емес, қала, тіпті облыс деңгейінде түрлі қоғамдық шараларға атсалысуда.
Бөлімшедегі ардагерлер кеңесі алдағы уақыттағы жұмыстар барысын жаңаша сипатта бұрынғыдан да ширата түспек. Бұл жайында жуырда Мәскеу қаласынан, ТМД бойынша теміржолшы ардагерлер ұйымдары төрағалары бас қосқан жиыннан оралған жергілікті ұйымның төрағасы Қырықбай Әлсейітов ой бөлісті.
«Қазақстан темір жолы» ҰК» АҚ президенті жанындағы Консультативтік кеңес мүшесі, Семей жол бөлімшесі бойынша ардагерлер кеңесінің төрағасы, Құрметті теміржолшы Қырықбай Әлсейітұлы осыдан біраз бұрын Мәскеу шаһарында өткен Ресей теміржолы орталық ардагерлер кеңесінің 15 жылдық мерейтойынан оралған болатын. Қадірменді ақсақалдың айтуынша, осынау іргелі шара барысындағы «Күміс күз» атты фестивальге елімізден аттанған делегация құрамында алты теміржолшы-ардагер барған екен. Еуразиялық одақ елдерінен жиналған жалпы саны 146 қарт теміржолшы Мәскеу іргесіндегі арнайы пансионатта аптаға жуық уақыт болып, келелі кеңес өткізіпті.
– Басты тақырып ретінде ардагерлер қауымына жасалатын қамқорлық шаралары кеңінен сөз болды. Оның ішінде салауаттылық салтын ұстану, денешынықтыру, яғни, теміржол саласы ардагерлерінің өмір жасын ұзарту бағытында жұмыс жүргізу жайында әйгілі профессорлардан дәріс тыңдадық. Ескермейтініміз көп екен. Мұның барлығын күнделікті тәжірибеде қолданудың маңыздылығы зор. Қысқасы – үйренеріміз көп болды, – дейді ақсақал.
Игілікті шара барысында өткізілген «Денсаулық +60» атты арнайы семинардың тағылымы мол болған. Елімізден барған кеңес төрағалары үйренгендерін өзге әріптестерімен бөлісіп, күнделікті тәжірибеде қолдануды ұйғарыпты. Ресейлік теміржол саласынан зейнетке шыққан жандардың белсенділігі жоғары екен. Қоғамдық шаралардан шет қалмайды. Сонымен қатар, жастары 70-тен асса да спортпен шұғылданып, күнделікті бассейнге, фитнесклубқа баратындар өте көп. «Бұл ретте, біздің ардагерлер үшін өмір сүру салтына өзгерістер енгізген дұрыс. Отбасынан ұзап шықпайтын қарттар көп. Оларды ендігі аралықта қоғамдық өмірдің барлық салаларында белсенді болуға шақырамыз», – дейді Қырықбай Әлсейітұлы.
Қарт теміржолшы осынау шараның тиімділігі зор болғанын айтады. Кешегі Кеңес дәуірінде отандық теміржол саласын бірге өркендеткен байырғы әріптес қариялар арасында ұзақ жылдардан соң бір-бірін қайта тауып, қауышқандары көп болыпты. Сондай-ақ, аға буын арасында шахмат, дойбы, дартс бойынша түрлі спорттық шаралар ұйымдастырылыпты. Қорыта айтқанда, ардагерлер қауымы Ресей төріндегі ардагелер тойынан үлкен әсер, мол олжамен оралған.
Қазіргі күні ұлттық компания тарапынан ардагерлер қауымына ерекше көңіл бөлінуде. Сондай-ақ, Семей ЖТ бөлімшесіндегі бастауыш ардагерлер ұйымы тарапынан да тұрақты түрде ілкімді шаралар жүргізілуде. Оның барлығын ендігі аралықта осындай басқосулардан түйіп қайтқан әлемдік деңгейдегі озық тәжірибелермен ұштастыра жүргізудің маңыздылығы жоғары болмақ. Міне, осынау тақырып аясында жергілікті кеңес төрағасы Қырықбай Әлсейітұлы бастаған семейлік ардагерлер қауымы өзара келелі кеңес өткізіп, нақты ұйғарым жасады. Басты мақсат – ғұмырын теміржол саласын өркендетуге арнаған қарттардың өскелең буынға өнеге-үлгі болып, мығым денсаулықпен ұзақ өмір сүру.
Қуаныш Қожаев, Семей