Шымкенттік теміржолшылар отбасы «Алтын топ» республикалық турнирінде бақ сынады
17-18 қараша күндері Алматыда жыл сайын өтетін «Алтын доп» республикалық турнирі болып өтті. Бұл турнирдің ерекшелігі, оған тек бір әулеттен шыққан ойыншылар ғана қатысады.
Биыл жарысты Престиж футбол лигасы (PFL-2018) ұйымдастырыпты. Турнирге барлығы 20 команда қатысты. Шымкент жүк тасымалы бөлімшесінен сайысқа арыстық теміржолшылар Жаңабаевтар әулеті қатысып, сол жиырма команданың ішінен 6-орынға табан тіреді. Салауатты өмір салтын ұстануды дәстүрге айналдырған әулет аймаққа бұрынна-ақ танымал. Биыл бөлімшенің намысын республикалық жарыста қорғаған әулет командасы 8 адамнан құралған. Ойын алаңында бес рет қарсыластарымен кездесіп, жалпы есепте алтыншы орыннан көрінген теміржолшылар әулетінің жеңісі жоғары бағалауға лайық.
Шымкент ЖТ бөлімшесіндегі диспетчерлік орталықтың электромеханигі Панзарбек Жаңабаевтың айтуынша, жарысқа қатысу ақылы түрде жүргізілген.
«Турнир жылына бір рет өтеді. Шыны керек, біздің ешқандай жаттықтырушымыз да, демеушіміз де жоқ. Бәрі ақылы. Алматы қаласына да өз қаражатымызбен барып, өзіміз қатысып келдік. Жолақысы, тамағымыз, қонақ үй – бәрінің қаражаты өз қалтамыздан шықты. Жарысқа жылдағыдай балаларым мен немерелерім қатысты. Менің бір тілегім, Шымкент ЖТ бөлімшесі басшылығы, оның ішінде кәсіподақ бөлімі осы жағын ескеріп, қаржылай қолдаса деген ұсынысым бар. Себебі, спорт – салауатты өмір салты. Оның үстіне, әулетіміз аймақтағы бөлімшенің абыройын көтеріп жүр ғой», – деген әулет ағасының сөзінің жаны бар.
Жалпы, жұмыс өтілі жүздеген жылдарды құрайтын еңбек әулеттері теміржолда көптеп саналады. Ендеше, ҚТЖ спорт мамандары алдағы уақытта олардың арасында өзара жарыстар ұйымдастыру арқылы әулеттер даңқын арттыра түссе, нұр үстіне нұр болмақ.
Жансая Сыдықбай, Шымкент