"Балалар күлкісі станциясы": Семейдің жас теміржолшылары қайырымдылық марафонын өткізді
Семейлік теміржолшы жастар жыл көлеміне жоспарланған шараларын қорытындылауда. Мәселен, жуырда қайырымдылық марафонының соңғы кезеңін тәмамдады. Аталмыш акция жергілікті теміржолшылардың мүгедек балаларына көмек жасау мақсатында қолға алынып, «Балалар күлкісі станциясы» деген жобамен қолға алынған болатын.
Жастардың қайырымдылық мақсатында қаржы жинау бастамасына бөлімше басшысы Марлен Көкірекбаев құптау білдіріп, бағыт-бағдар беріп, мүмкіндігінше қолдау-көмек білдіріп отырды. Осы жолы, мысалы, таңертеңгілік мезгілде бөлімшенің бірінші қабатындағы кең фойеде тағам өнімдерінің жәрмеңкесі биылға соңғы рет өткізілді. Әдеттегіше, әріптестеріне ұсынылатын тағамның барлығын теміржолшы қыздар үйлерінен өздері пісіріп әкелді. Алдын ала әзірлікпен ықшам түрде ұйымдастырылған жәрмеңке екі күн ішінде де бас-аяғы жарты сағатқа жетпей тәмамдалды. Оның үстіне бұл бөлімшеде жұмыс істейтін теміржолшы қызметкерлер тарапынан қолдау тапқан шара болып отыр. Себебі, қыздардың пісірген ыстық тағамдарын да, тәттілерін де қоймайды, сатып алушылар әп-сәтте алып кетеді. Бұл жолы да солай болды.
Айта кетсек, жыл жабар бұл шара осымен төртінші мәрте өткізіліп отыр. Бұл жолы да қомақты қаражат түсті. Ал бұл соманы қандай мұқтаж жандарға беру керектігі жөніндегі мәселе алдағы уақытта өтетін жастар кеңесінің басқосуында талқыға түсетін болады. Әзірге, ұсыныс бойынша екі бірдей теміржолшы отбасы жастар көмегіне ие болмақ. Яғни, осымен жыл көлемінде сегізінші отбасы әріптестері тарапынан қамқорлыққа бөленеді деген сөз.
– Бұл жоба негізінде 2014 жылы басталған-ды. Алғашында қаладағы балалар үйлерінде мереке сайын қайырымдылық шараларын өткізетінбіз. Қазіргі күні өзіміздің ЖТ бөлімшесі мен НЖС-6 бойынша мүгедек балалары бар теміржолшыларға көмек көрсету мақсатында жәрмеңке өткізудеміз. Бүгінгі өткен шараға да жастар жоғары белсенділікпен қатысты. Барлығына айтар алғысым зор, – дейді «ҚТЖ» ҰК» АҚ президенті жанындағы жастар ісі жөніндегі кеңестің Семей жүк тасымалдау бөлімшесі бойынша аймақтық өкілі Ләззат Айтмұханова.
Қуаныш ҚОЖАЕВ, Семей