Ақтөбелік ардагер теміржолшы министрлік медалімен марапатталды
Ақтөбе аймақтық теміржолшы ардагерлер кеңесінің төрағасы Бошық Қуатов Қазақстан Республикасы Инвестициялар және даму министрлігінің «Еңбек ардагері» медалімен марапатталды.
Салаға қырық жыл еңбегі сіңген құрметті теміржолшыға марапатын салтанатты түрде табыс еткен «ҚТЖ-Жүк тасымалы» Ақтөбе филиалының басшысы Бөріхан Беркімбаев зейнеткер болса да қоғамдық жұмыстардың бел ортасынан табылып, талай игі істерге ұйытқы болып жүрген Бошық Қуатовқа алғыс айтып, омырауына «Еңбек ардагері» медалін тақты.
– Барлық әріптестеріңіздің атынан Сізді бұл үлкен марапатыңызбен құттықтаймын. Сіздің барлық саналы ғұмырыңыз теміржол көлігімен байланысты. Бүгінде ұйымшылдығыңыздың арқасында ардагер теміржолшылардың ұйымын басқарып, белсенді жұмысын арттырып отырсыз. Теміржолшылар арасында өтетін талай қоғамдық шараларға мұрындық болып, жөн сілтеп отырсыздар. Өсіп келе жатқан жас буынға ақсақалдық, аталық үлгі-өнегелеріңізді көрсетіп отырсыздар, – деді марапат иесіне құттықтауын жаудырған бөлімше басшысы.
Бошық Қуатов Ақтөбе аймақтық теміржолшы ардагерлер кеңесінің төрағасы болып соңғы екі жылдан бері еңбек етіп келеді. Биыл да төрағалық қызметке қайта тағайындалды. Белсенді қарттың басқаруындағы теміржолшы ардагерлер ұйымының жұмысы жоғары бағаланып отыр.