Жетім көрсең, жебей жүр...
ҚТЖ жастарының арасынан құрылған еріктілер тобы жақында Қарағандыдағы Осакаровка ауданы, Пионерское селосында орналасқан «Жетім балаларға арналған пионерлік балалар үйіне» барып, қайырымдылық шарасын жасады.
Бүгінгі таңда 90 бала тәрбиеленетін аталған балалар үйінде жас теміржолшы еріктілер балаларға тәтті тоқаштар, жеміс-жидектер мен шырындар қойылған дастархан дайындап, түрлі интерактивті ойыншықтар мен жейделер сыйлады.
– Туған ата-анасынан пана көрмеген балақайлармен кездескенде біздің жас теміржолшылардың байқағаны – бұл балалардың соншалықты жан-жақтылығы, бауырмалдығы болды. Олар футбол, волейбол, баскетбол ойындарын жақсы ойнайды. Конькимен сырғанайды, ән де айтады, би де билейді, тоқиды. Өздері сондай ақылды балалар. Бұл ерекше күнде олар үлкендер тарапынан көрсетілген назарға риза болып, көңілдері шаттыққа толды. Осы бір игілікті істі атқаруға шын жүрегімен атсалысқан барша азаматтарға, қайырымды жандарға алғыс білдіреміз, – дейді ұйымдастырушылардың бірі, «ҚТЖ» ҰК» АҚ Басқарма төрағасы жанындағы Жастар ісі жөніндегі кеңестің Астана аймақтық өкілі Гүлім Бейсбекова.
Гүлімнің айтуынша, қайырымдылық шарасына қатысуға ниетті азаматтар көп болған. Олар ақшалай да, заттай да көмек көрсетіп, бір қайырымды жан «Monkey finger link» интерактивті ойыншықтарын жеткізген. Еріктілер тобының мәлімдеуінше, Астанадағы балалар үйлері қаржылық қамтамасыз етілу және моральдық қолдау жағынан кемшін емес, сондықтан олар елордадан шалғай жатқан аталған балалар үйіне баруға шешім қабылдаған. Балаларды қуантқан теміржолшы еріктілер тобына балалар үйінің директоры Анатолий Цебер де алғысын білдіріп, жас мамандар жұмысына табыс тіледі.
Ұлан ОРАЗ